Túrkistan oblysyndaǵy órtten qoishy qaza taýyp, myńnan asa qoi qyryldy. Bul týraly QR Tótenshe jaǵdailar ministrliginiń resmi ókili Talǵat Ýáli málimdedi, dep habarlaidy Tengrinews.kz agenttigi.
Báidibek aýdany Alǵabas aýylynan bes shaqyrym jerdegi sharýa qojalyǵy aýmaǵyndaǵy mal ustaityn eki qabatty ǵimarattan órt shyqqan. Habarlama 101-ge 31 qańtarda saǵat 7.15-te túsken.
Ǵimarattyń birinshi qabatynda usaq mal ustalsa, ekinshi qabatynda shóp saqtalǵan. Fermadan jaqyn mańdaǵy órt sóndirý beketine deiingi aralyq 40 shaqyrym bolady. Órt sóndirýshiler oqiǵa ornyna 40 minýtta jetken.
Saldarynan 1150 bas qoi men 150 tonna syǵymdalǵan shóp órtenip ketti. Oqiǵa ornynan shopannyń denesi tabyldy.
Tótenshe jaǵdailar ministrliginiń málimetinshe, órt 09.37-de oqshaýlanyp, 10.23-te aýyzdyqtalǵan. Órt aýmaǵy 781 sharshy metr bolady. Órttiń shyǵý sebebi anyqtalyp jatyr. Órt sóndirýge Túrkistan oblysy Tótenshe jaǵdailar departamentiniń 15 órt sóndirýshisi men 4 bólimshesi jumyldyryldy.
