Foto: Gov.kz.
Túrkistan oblysynda biyl «Óńirlik jumyspen qamtý kartasy» aiasynda 118 myńnan astam jumys ornyn ashý josparlanyp, qazirgi tańda 104 635 jumys orny quryldy, dep habarlaidy «Ult aqparat».
Óńir turǵyndaryn jumyspen qamtý baǵytynda jyl basynan beri atqarylǵan jumystar, kemshilikter men ózge de túitkildi máseleler Túrkistan oblysy ákiminiń orynbasary Beisenbai Tájibaevtyń tóraǵalyǵymen ótken jiynda talqylandy.
Oblystyq jumyspen qamtýdy úilestirý jáne áleýmettik baǵdarlamalar basqarmasynyń basshysy Ásiia Temirbaevanyń 2024 jyldyń 10 aiynyń qorytyndysy týraly esebi tyńdaldy. Ulttyq jobalar men tujyrymdamalar negizinde infraqurylymdyq jobalarda ashylǵan jumys oryndaryna joldanǵan azamattardyń mindetti zeinetaqy jarnasynyń aýdarylýy boiynsha respýblikada 4 orynǵa ornalasty.
Sýbsidiialanatyn jumys oryndaryn uiymdastyrý, Jastar praktikasy, múgedektigi bar adamdardy jumyspen qamtý kvotasy baǵyttary boiynsha tómen kórsetkishter baryn jasyrmady. Oblys ákiminiń orynbasary jospardy tiisti deńgeide atqarmaǵan Báidibek, Maqtaaral, Jetisai, Otyrar, Saýran aýdandarynyń máseleleri jeke-jeke qaralyp, kemshilikterdi túzetýge ýaqyt berdi.
Májiliste Túrkistan oblysynyń jumyspen qamtýdy úilestirý jáne áleýmettik baǵdarlamalar basqarmasyna qarasty Eńbek mobildiligi ortalyǵynyń direktory Abzal Kazankapovtyń baiandama jasady. Biyl sýbsidiialanatyn jumys oryndaryna 31 208 adamdy jumysqa joldaý josparlanyp, naqty 32 578 adam jumyspen qamtylǵan. Jańa jáne bos jumys oryndary boiynsha 39,1 myń turaqty jumys orny ashyldy. Ulttyq jobalar aiasynda 2024 jyly 397 jobany júzege asyrý josparlansa onyń 362-si oryndalǵan. 3671 jańa jumys ashý mejelenip, 3106 azamat jumysqa ornalasty.
Budan bólek, «Jastar praktikasy» jáne «Kúmis jas» jobalary, qoǵamdyq, áleýmettik jáne alǵashqy jumys oryndarymen jergilikti turǵyndardy qamtý, probatsiia esebinde turǵan nemese bas bostandyǵynan aiyrylǵan, tul jetimder men múgedektigi bar azamattardy jumyspen qamtý boiynsha aýdan, qalalardaǵy jumystar saralanyp, indikatorlardyń oryndalýy qaraldy.
Eńbek mobildiligi ortalyǵy tarapynan memlekettik qaitarymsyz grant qarajatynyń nysanaly jumsalýyna turaqty monitoring jumystary júrgizilýde. Búginde 2023 jyly grantpen qamtylǵan 23 azamattyń qarjyny maqsatsyz paidalanǵany anyqtalyp, memleketke qaitarý boiynsha sot sheshimi shyqty. Qarajatty qaitarý jumystary júrgizilýde.
Al aqyly qoǵamdyq jumys oryndaryna jiberilgen 575 azamatpen eńbek tártibin saqtamaǵany úshin kelisimshart birjaqty toqtatyldy. Sýbsidiialanǵan jumys oryndaryna joldanǵan 2517 azamatpen de kelisimshart úzildi.
Beisen Dáýletuly «Mansap» ortalyqtaryndaǵy kadrlardyń biliktiligin arttyrýǵa asa mán berýdi, jumysty jandandyrý boiynsha usynys-pikirlerge ashyq ekenin jetkizdi. Jospardy tiisti deńgeide oryndamaǵan jaýapty basshylarǵa syn aityp, kemshilikterge jol bergenderge tiisti shara kóriletinin eskertti.
