Túrkistan oblysy Saryaǵash aýdany Qaplanbek aýylynda kúieýin asa qatigezdikpen óltirgen 34 jastaǵy áiel 15 jylǵa sottaldy. Áiel byltyr 10 tamyzda nekedegi kúieýin úiinde óltirgen. Bul týraly "Ult aqparat" Stan.kz aqparat agenttigine silteme jasap habarlaidy.
Daý TikTok-tan bastalǵan. Áieldiń anasynyń aitýynsha, 40 jastaǵy joldasy áieline áleýmettik jelige video túsirýge tyiym salyp, janjal týǵan.
“Sol kúni qarbyz alyp kelgen. Balalarymen birge qarbyz jep otyrǵan. Qyzym ózi TikTok túsiredi, kishkentai kezinen aktrisa bolýdy armandaityn. Jelidegi videosyn kórip qoiyp, kúieýi urys shyǵarǵan. Balasynyń aitýynsha, “osydan keiin ol qyzyma pyshaq berip, ózińe tyq” degen. Úshke deiin sanaimyn, ózińdi óltiresiń, meniń qolymnyń izi qalmaidy degen. Ol “óz-ózime qalai tyǵamyn” dep jylaǵan”, – deidi anasy.
Osylai dep jylaǵan Tillaiym Moldabekova qyzynyń turmysqa shyqqaly qorlyq kórgenin aitady.
“Qyzymnyń kórmegeni joq. Qazir balalary aityp jatyr: ”Mamamdy jalańashtap muzǵa qoiyp qoiatyn” dep. “Áke, kirgiz” dep jylasa da kirgizbegen. Temeki shegip, shoǵyn qyzymnyń keýdesine basady eken. Ózi kólik jóndeitin, sonyń temirlerimen de uryp-soqqan. “Óltirip, kómip tastaimyn, áke-shesheńmen qosyp jaǵyp jiberemin” dep ábden qorqytqan. Sonyń bári jinalyp osy qylmys jasaldy ”, – deidi sottalýshynyń anasy Tillaiym Moldabekova.
Belgili bolǵandai 34 jastaǵy áiel kúieýin óltirgesin qylmysyn jasyramyn dep denesin bólshektep tastaǵan eken. Máiitti bóshkege salǵan qylmysker ótinish jasap, kórshisiniń kóligimen máiitti Keles ózenine aparǵan. Áieldiń tún ishindegi bul áreketinen kúdiktengen kórshi úshinshi kúni bóshkeni ashyp kóripti. Sodan Qundyz Moldabekovanyń qylmysy áshkere bolady. Oǵan deiin áiel máiittiń bólshektengen úsh bóligin ózenge aǵyzyp úlgergen. Sondai-aq joldasynyń kóligin 2 million 300 myńǵa dosyna satypty. Osylaisha Túrkistan oblysynyń turǵyny 99-baptyń 2-bóligi (Adam óltirý) jáne 190 baptyń 1-bóligi (Alaiaqtyq) boiynsha aiyptalyp, 15 jylǵa bas bostandyǵynan aiyryldy.
“Bizdiń bar surarymyz qyzymnyń balalary bizdiń qolda qalsa eken. Olardy bul oqiǵa bolmai turyp óz tárbiemizge alǵanbyz. Endi bizden aiyrmasa eken”, – deidi sottalýshynyń anasy Tillaiym Moldabekova.
Aita keteiik, marqumnyń týystary kelinderiniń ómir boiyna sottalýyn suraǵan edi. Keshirim bermeimiz degen jábirlenýshi taraby balalardyń balalar úiine tapsyrylýyn da suraǵan. Endi balalardyń qaida qalatynyn Saryaǵash aýdanynyń adami áleýetti damytý bólimi sheshedi.
