Túrkistan oblysynda toi ótkizýdi toqtatpai otyrǵan 50 toihananyń isi sotqa joldandy. Bul týraly oblysty sanitarlyq-epidemiologiialyq baqylaý departamenti málim etti, dep habarlaidy "Ult aqparat".
Atalǵan departamenttiń málimetinshe, búginde óńirdegi meiramhanalar men toihanalardyń sany 200-den asady. Epidemiologiialyq jaǵdaiǵa bailanysty elimizde 1 jyldan astam ýaqyttan beri otbasylyq merekelik is- sharalardyń barlyǵyna tolyqtai tyiym salynǵandyǵy belgili. Degenmen óńirde toilardyń ótýi áli kúnge deiin toqtamai otyr.
Jyl basynan beri mobildi top pen politsiia qyzmetkerleri 726 otbasylyq merekelerdi anyqtaǵan. Otbasylyq sharalardyń 435-i meiramhanalarda, 291-i jeke úilerde uiymdastyrylǵan. Ordabasy aýdanynda «Shańyraq» toihanasy 9 ret, Arys qalasynda «Asylai» toihanasynda 8 ret, Saryaǵashta «Altyn Ǵasyr» toihanasy 6 ret, Otyrarda «Juldyz», «Nursaia», «Altyn Shańyraq», Jetisaida «Altyn Sarai», «Tabiǵat», Tóle bide «Appaq ana», «Shańyraq», Kentaý qalasynda «Aqerke», Túlkibasta «Kerýen», «Kókjailaý», Shardara aýdanynda «Grand Aziia» toihanalary 3 retten toi ótkizýge jol berse, Qazyǵurt aýdanynda «Talǵat», «Talǵai ata», «Medeý ata», «Hanshaiym», «Qazyǵurt ónimderi» meiramhanalary karantin rejimine qaramastan 2 retten otbasylyq sharalar ótkizgen.
«50 meiramhananyń isi sotqa ótkizilip, 34-ne qyzmetterin ýaqytsha toqtatý týraly sot sheshimderi shyqty. Ókinishke orai, keibir toihana qojaiyndary sot sheshiminiń merzimi aiaqtalǵan soń, qaita toi ótkizýdi jalǵastyrýǵa kirisken. Máselen Túrkistan qalasynda «Ulytaý», Maqtaral aýdanynda «Ferýz» toihanalaryna 2 retten sot sheshimi shyqqan. Karantin talaptaryn saqtamai, covid-19 infektsiiasynyń taralý qaýipin týdyrýǵa jol bergen kásipkerler men jeke tulǵalarǵa ákimshilik quqyq buzýshylyq boiynsha aiyppuldar salyndy» delingen habarlamada.
