تٷركٸستان وبلىسىندا توي ٶتكٸزۋدٸ توقتاتپاي وتىرعان 50 تويحانانىڭ ٸسٸ سوتقا جولداندى. بۇل تۋرالى وبلىستى سانيتارلىق-ەپيدەميولوگييالىق باقىلاۋ دەپارتامەنتٸ مەلٸم ەتتٸ, دەپ حابارلايدى "ۇلت اقپارات".
اتالعان دەپارتامەنتتٸڭ مەلٸمەتٸنشە, بٷگٸندە ٶڭٸردەگٸ مەيرامحانالار مەن تويحانالاردىڭ سانى 200-دەن اسادى. ەپيدەميولوگييالىق جاعدايعا بايلانىستى ەلٸمٸزدە 1 جىلدان استام ۋاقىتتان بەرٸ وتباسىلىق مەرەكەلٸك ٸس- شارالاردىڭ بارلىعىنا تولىقتاي تىيىم سالىنعاندىعى بەلگٸلٸ. دەگەنمەن ٶڭٸردە تويلاردىڭ ٶتۋٸ ەلٸ كٷنگە دەيٸن توقتاماي وتىر.
جىل باسىنان بەرٸ موبيلدٸ توپ پەن پوليتسييا قىزمەتكەرلەرٸ 726 وتباسىلىق مەرەكەلەردٸ انىقتاعان. وتباسىلىق شارالاردىڭ 435-ٸ مەيرامحانالاردا, 291-ٸ جەكە ٷيلەردە ۇيىمداستىرىلعان. ورداباسى اۋدانىندا «شاڭىراق» تويحاناسى 9 رەت, ارىس قالاسىندا «اسىلاي» تويحاناسىندا 8 رەت, سارىاعاشتا «التىن عاسىر» تويحاناسى 6 رەت, وتىراردا «جۇلدىز», «نۇرسايا», «التىن شاڭىراق», جەتٸسايدا «التىن ساراي», «تابيعات», تٶلە بيدە «اپپاق انا», «شاڭىراق», كەنتاۋ قالاسىندا «اقەركە», تٷلكٸباستا «كەرۋەن», «كٶكجايلاۋ», شاردارا اۋدانىندا «گراند ازييا» تويحانالارى 3 رەتتەن توي ٶتكٸزۋگە جول بەرسە, قازىعۇرت اۋدانىندا «تالعات», «تالعاي اتا», «مەدەۋ اتا», «حانشايىم», «قازىعۇرت ٶنٸمدەرٸ» مەيرامحانالارى كارانتين رەجيمٸنە قاراماستان 2 رەتتەن وتباسىلىق شارالار ٶتكٸزگەن.
«50 مەيرامحانانىڭ ٸسٸ سوتقا ٶتكٸزٸلٸپ, 34-نە قىزمەتتەرٸن ۋاقىتشا توقتاتۋ تۋرالى سوت شەشٸمدەرٸ شىقتى. ٶكٸنٸشكە وراي, كەيبٸر تويحانا قوجايىندارى سوت شەشٸمٸنٸڭ مەرزٸمٸ اياقتالعان سوڭ, قايتا توي ٶتكٸزۋدٸ جالعاستىرۋعا كٸرٸسكەن. مەسەلەن تٷركٸستان قالاسىندا «ۇلىتاۋ», ماقتارال اۋدانىندا «فەرۋز» تويحانالارىنا 2 رەتتەن سوت شەشٸمٸ شىققان. كارانتين تالاپتارىن ساقتاماي, covid-19 ينفەكتسيياسىنىڭ تارالۋ قاۋٸپٸن تۋدىرۋعا جول بەرگەن كەسٸپكەرلەر مەن جەكە تۇلعالارعا ەكٸمشٸلٸك قۇقىق بۇزۋشىلىق بويىنشا ايىپپۇلدار سالىندى» دەلٸنگەن حابارلامادا.
