«Azamattarǵa arnalǵan úkimet» memlekettik korporatsiiasynyń Basqarma tóraǵasy Ásemgúl Baltashevanyń tapsyrmasymen Maqtaaral aýdanyndaǵy tasqyn sýdyń zardabynan evakýtsiialanǵan turǵyndarǵa qujattaryn qalpyna keltirip, kómek kórsetý úshin jasaqtalǵan 5 mobildi top apat aimaǵyna jiberildi.
Bul týraly Túrkistan oblysynyń Óńirlik kommýnikatsiialar qyzmetinen habarlandy.
Memlekettik korporatsiianyń barlyq qajetti quraldarmen jabdyqtalǵan mobildi Halyqqa qyzmet kórsetý ortalyqtary (HQO) aýdan boiynsha ornalasqan 19 evakýatsiialaý pýnkterin kezekpen aralaidy. Mamandar zardap shekken jergilikti turǵyndarǵa memlekettik qyzmetter boiynsha quqyqtyq keńes berip, qujattaryn qalpyna keltirý úshin ótinish qabyldaidy.
Bul rette turǵyndardy qujattandyrý boiynsha migratsiialyq qyzmet basqarmasymen jáne basqa da atqarýshy organdarmen jedel túrde yqpaldasý uiymdastyrylǵan. Mobildi top birinshi jumys kúni 150-den asa adamǵa memlekettik qyzmetter boiynsha keńes berdi. Evakýatsiialaý pýnkterinde mamandar maqtaaraldyqtardyń joǵalǵan qujattaryn qaita rásimdeýge ótinishter qabyldap jatyr.
Esterińizge sala keteiik, osydan bir jyl buryn Arys qalasyndaǵy áskeri qoimada bolǵan jarylysqa bailanysty tótenshe jaǵdai kezinde de memlekettik korporatsiia qyzmetkerleri jumysyn toqtatpai, jergilikti ákimdikpen birlese shtabtarda, dalalyq jaǵdaida apattan zardap shekken azamattardyń qujattaryn retke keltirý úshin úzdiksiz qyzmet etti. Tótenshe jaǵdai kezinde arystyqtarǵa HQO mamandary 17 myń qyzmet kórsetti.
