Túrkistan oblysynyń Tólebi aýdany, Qasqasý eldi mekeninde 3 kópir eki táýliktiń ishinde qalpyna keltirildi. Zaqym kelgen taǵy bir kópir qysqa ýaqytta rettelmek, - dep habarlady Túrkistan oblysy ákiminiń baspasóz qyzmeti.
Baspasóz málimetterine qaraǵanda, qazir atalǵan aimaqta kólikterdiń júrýine eshqandai qaýip joq. Ótkelder tolyq retke keltirilip, aýyldar arasynda bailanys ashyldy. Eldi mekenderde elektr energiiasy jáne tabiǵi gazben qamtý jaǵdaiy da turaqty.
Sonymen qatar Tólebi aýdanynyń Qasqasý, Kenesaryq, Qosaǵash, Ekpindi, Birkólik, Kielitas, Dostyq jáne Leńgir qalasynyń aýmaǵynda ornalasqan eldi mekenderde jinalǵan jańbyr sýynan tazalyq jumystary tynymsyz júrgizilip jatyr. Tasqyn sýdan zaqym kelgen aýdandyq jáne oblystyq mańyzy bar kóshelerdi qalypqa keltirý jumystary júrgizilip, keltirilgen zalal shyǵyndary eseptelýde.
Eske sala keteiik, nóser jaýynnyń saldarynan Tólebi aýdanyndaǵy ózenderdiń sý deńgeii kóterilip, aryq-atyz, qyr-sailardan jinalyp aqqan jańbyr sýynan 6 eldi mekendegi 250 turǵyn úidiń aýlasyn sý shaiǵan. Tótenshe jaǵdaiǵa bailanysty, jedel shtab qurylyp, sý basqan eldi mekenderde tiisti jumystardy atqarý úshin 4 sektor belgilengen bolatyn. Atap óter bolsaq, sýdan keltirilgen zalaldy joiý mindeti Qazyǵurt, Ordabasy, Sairam jáne Tólebi aýdandaryna bekitildi.
Sý basqan aimaqtardy retke keltirý jumystaryna 300-ge jýyq adam, 27 motopompa, 38 tehnika jumyldyrylǵan.
