Túrkistan oblysynda Ekinshi dúniejúzilik soǵysqa qatysqan maidangerler 1 mln teńgeden alady, dep habarlaidy "Ult aqparat".
Óńir ákimdiginiń baspasóz qyzmetinen málim etkendei, Túrkistan oblysynda qazirgi ýaqytta Ekinshi dúniejúzilik soǵysqa qatysqan 28 ardager turady.
«Jeńistiń 76 jyldyǵyn merekeleýge bailanysty olardyń árqaisysy 1 mln teńge kóleminde birjolǵy tólem alady. Sondai-aq Ekinshi dúniejúzilik soǵystyń qatysýshylary men múgedekterine teńestirilgen 214 tulǵaǵa birjolǵy materialdyq tólem qarastyrylǵan», - dedi ákimdikten.
Jalpy, Túrkistan oblysy boiynsha 6808 ardagerge Jeńis merekesiniń qurmetine birrettik materialdyq kómek tóleý úshin aýdandyq, qalalyq biýdjet esebinen 233,2 mln teńge qarjy bólingen.
Maidangerler tiisti kómekti 4 mamyrǵa deiin tolyq alatyn bolady. Onyń ishinde:
- Ekinshi dúniejúzilik soǵysqa qatysqan 28 azamatqa jáne soǵys múgedekterine – 1 mln teńgeden;
- 6722 tyl eńbekkeri men qaza bolǵan jaýyngerlerdiń jesirlerine – 30 000 teńgeden;
- blokadalyq Leningradtyń 55 turǵynyna, soǵysta qaitys bolǵandardyń jesirlerine – 60 000 teńgeden;
- tutqynda bolǵan kezde kámeletke tolmaǵan 3 azamatqa, soǵys qatysýshylaryna teńestirilgen basqa da sanattarǵa – 100 000 teńgeden belgilendi.
«Sonymen qatar, Túrkistan oblysynyń barlyq aýdan, qalalarynda oblys ákiminiń tapsyrmasyna sáikes soǵys ardagerleriniń úilerine baryp, quttyqtaý sharalary júrgiziledi. Ardagerler uiymdarynyń tóraǵalarymen birlesip ótkiziletin shara barysynda karantin talaptary qatań saqtalady. Onda oblys ákimi Ómirzaq Shókeevtiń atynan ardagerlerge quttyqtaý tilegi jetkizilip, syi-qurmet kórsetiledi», - dep qosty vedomstvodan.
Búginde Túrkistan oblysynda soǵys ardagerleri turǵyn úimen tolyq qamtamasyz etilgen. Saýyqtyrý sharalaryn júrgizý maqsatynda 28 maidanger úilerinde qajetti meditsinalyq qyzmetti aldy. Dispanserlik tekserýden ótkizildi.
«Sondai-aq jyl saiyn oblystyń tarihi jáne mádeni eskertkishteriniń tehnikalyq jaǵdaiyna monitoring júrgizilip, tiisinshe jóndeý jáne abattandyrý jumystary júzege asyrylýda.
Oblys boiynsha 315 eskertkish, 78 memorial, monýmenttik keshen bar. Búgingi tańda olardyń birqatary jańartylýda.
Jyl saiyn aǵa urpaq ókilderin saýyqtyrý maqsatynda 7,8 myń jekelegen sanattaǵy azamattar demalyp, emdeledi (Ardagerler úiinde – 4000 adam, «Meiir» ardagerler úiinde - soǵys ardagerleri men olarǵa teńestirilgender, zeinetkerler, barlyǵy 3800 adam)», - dedi Túrkistan oblysy ákiminiń baspasóz qyzmetinen.
