Búgin Túrkistan oblysyna qarasty Tólebi aýdanynda birqatar nysandar igiligine berildi. Oblys ákimi Janseiit Túimebaev bastaǵan top, eń aldymen, ondaǵy Birinshi Mamyr aýylynan ashylǵan «Balmuzdaq» JShS-niń shokoladty glazýr jáne shokolad óndeitin tsehynda boldy, dep habarlaidy "Ult aqparat".
Joba quny - 800 mln teńge. Kásiporynda jylyna 1100 tonna shokoladty glazýr men shokolad ónimderi óndiriledi dep kútilýde.
Negizinen, «Balmuzdaq» JShS 2017 jyly quny 2,5 mlrd teńge bolatyn 3200 tonna balmuzdaq ónimderin óndirgen. Al byltyr Ózbekstanǵa 6,1 mln teńgege 8700 kg balmuzdaq eksporttady. Kásiporyn búgingi kúni balmuzdaqtyń 80-nen astam túrin shyǵarady. Kásiporyn quny 220 mln teńge turatyn balmuzdaq óndiretin qazirgi zamanǵy qural-jabdyqpen jabdyqtalǵan.
«Balmuzdaq» JShS-niń ónimderi tek qana Túrkistan oblysynda ǵana emes, respýblikamyzdyń soltústiginde, Almaty, Astana, Aqtaý, Taraz qalalarynda da úlken suranysqa ie.
Óndiris ornynyń jumysymen jiti tanysqan oblys ákimi kásipkerdiń isine sáttilik tilep, otandyq ónimdi óndirip, el turǵyndaryn sapaly ónimmen qamtýda aianbai eńbek ete berýine tilektestik bildirdi. Sondai-aq, shaǵyn jáne orta kásip ielerine memleket tarapynan qashanda tiisti qoldaý bolatynyn taǵy bir eske salyp, azamattyń isi kópke úlgi bolýy kerektigin aitty.
Óz kezeginde, oblys basshysy zaýyt jetekshiligine jańadan qurylǵan Túrkistan oblysynyń atyn shyǵaryp, jer-jahanǵa tanytý úshin «Túrkistan» brendimen shokolad túrin shyǵarýdy usyndy. Osynaý usynysty qoldaǵan kəsiporyn ujymy tez arada atalǵan ideiany júzege asyrýdy qolǵa alatynyn jetkizdi.
Búginde Tólebi aýdanyndaǵy kásipkerlik sýbektileriniń sany 8 211 bolsa, onyń 7594-i - belsendi jumys istep júrgen azamattar. Sonyń arqasynda mundaǵy ónerkásip salasynda byltyr jalpy 32 mlrd 166,2 mln teńgeniń ónimi óndirilip, 2017 jylmen salystyrǵanda 27,3 paiyzǵa artty. Kishi jáne orta biznesti damytý úshin aýdan boiynsha jalpy qarjylandyrý kózderinen 12 238 azamatqa 6 mlrd 727 mln teńgege nesie berilip, 2017 jylmen salystyrǵanda 18 paiyzǵa kóbeigen.
