Foto: Gov.kz.
Bul týraly Ortalyq kommýnikatsiialar qyzmetiniń Túrkistandaǵy kóshpeli baspasóz máslihatynda Túrkistan oblysynyń ákimi Darhan Satybaldy málimdedi. Túrkistan oblysynda alǵash ret «Shaǵyn ónerkásiptik park» jobasy júzege asyrylýda, dep habarlaidy «Ult aqparat».
– Álemdegi ekonomikasy damyǵan alpaýyt memleketterdiń tarihyna qarasańyz, órkenietke jetý joly óndiristen bastalǵan. Eger biz de salaǵa serpin beretin zamanaýi kásiporyndardy qura alsaq, ekonomikalyq táýelsizdikti de bekite túsemiz. Eń bastysy sol zaýyt pen fabrikada eńbek etetin eldiń sanasy ózgerip, eńsesi tiktelip, otandyq taýar ainalymynyń úlesi artady. Sondyqtan biz oblysta alǵash ret 100 gektar aýmaqta «Shaǵyn ónerkásiptik park» jobasyn ashqanymyzdy erekshe atap ótkim keledi. Joba aiasynda 308 mlrd. teńge investitsiia tartylyp, 151 óndiristik ǵimarat salynady. 6 myńǵa jýyq jańa jumys orny qurylady. Biýdjetke jylyna 2 mlrd. teńge salyq túsedi. Qazir 10 nysan salynyp, 8 kásiporyn ashylyp, 712 jumys orny qurylyp úlgerdi, – dedi Darhan Satybaldy.
Atalǵan aýmaqta jańbyrlatyp sýǵarý qondyrǵylaryn shyǵaratyn kásiporyndar ashyldy. Jihaz, muzdatqysh jáne qurylys zattaryn shyǵaratyn zaýyttar qoldanysqa berildi. Buryn tek shetelden ákelinetin sý únemdeý tehnologiialary búginde Túrkistanda shyǵarylýda. Óndiristik parkte ashylǵan kompaniialardyń sý únemdeý tehnologiialary elimizdiń ózge óńirlerine de satylyp jatyr.
