Túrkistan oblysynyń politseileri joǵalǵan 13 jasar balany Tarazdan taýyp, otbasyna qaitardy, dep habarlaidy "Ult aqparat" Túrkistan oblystyq politsiia departamentiniń baspasóz qyzmetine silteme jasap.
Baspasóz qyzmetiniń málimetterine qaraǵanda, Túrkistan oblysynyń Keles aýdandyq politsiia bólimine jergilikti turǵyndardyń biri kelip 2006 jylǵy ulynyń úiden belgisiz baǵytqa shyǵyp ketip, sodan qaita oralmaǵanyna shaǵymdanǵan. Ulynyń aman-esen oralýy úshin kómek berýin suraǵan aq jaýlyqty anaǵa politseiler kómek kórsetti.
Atalǵan jait Keles aýdandyq ishki ister bóliminiń sotqa deiingi tergeýdiń biryńǵai tizilimine engizilip, aýdandyq politseiler balany tabý jumystaryna shuǵyl kirisken.
Tártip saqshylary oblys boiynsha ár aýdan qaladaǵy politsiia bólimderi men basqarmalaryna habar berip, jedel-izdestirý jumystaryn júrgizdi. Jaqyn aimaqtardy aralap, balanyń barýy múmkin degen jerlerdi muqiiat tekserdi.
Nátijesinde joǵalǵan 13 jastaǵy balanyń Taraz qalasyndaǵy kámelet jasyna tolmaǵan balalardy beiimdeý ortalyǵynda ekendigi anyqtaldy. Aqparat kózderi arqyly aýdannyń eki politseii, balanyń anasy, aǵasy Taraz qalasyna baryp, joǵalǵan balany taýyp alyp, otbasyna aman-esen qaitardy.
Tergeý barysynda kámelet jasyna tolmaǵan bala, budan aldynda úiinen ketip, 2 kúnnen keiin Shymkent qalasynan tabylǵandyǵy anyqtaldy. Politseiler tekserý jumystary aiasynda bul joly onyń úiinen aqsha alyp ketkenin anyqtady. Sodan Keles aýdanynyń ortalyǵy Abai aýylyna barǵan, odan ary Shymkent qalasyna jetken. Qyzyq qýǵan bala munymen qaitpai, qalaaralyq avtobýsqa otyryp, Taraz qalasyna barǵan. Osynda konki tebetin oryndarda qydyrǵan. Osy kúnder aralyǵynda avtovokzaldarda túnegen.
Kámelet jasyna tolmaǵan balanyń qaraýsyz júrgenin baiqaǵan avtovokzaldaǵy qaraýyl tiisti mekemege habarlasqan. Joǵalǵan balanyń tártip saqshylaryna aitýynsha, ol jái qydyryp júrgen. Bul jaǵdaiǵa asa mán bergen politseiler tiisti sharalardy júrgizip, esepke qoiý máselelerin jasaýda.
