Túrkistan oblysynda koronavirýsqa qarsy qaýipsizdik sharalary júrgizilip jatyr, dep habarlaidy "Ult aqparat" oblys ákiminiń baspasóz qyzmetine silteme jasap.
QR Prezidenti Qasym-Jomart Toqaev Dúniejúzilik densaýlyq saqtaý uiymynyń jańa COVID-19 koronavirýsyn pandemiia dep jariialaýyna bailanysty azamattardyń ómiri men densaýlyǵyn qorǵaý maqsatynda Qazaqstan Respýblikasynyń barlyq aýmaǵynda tótenshe jaǵdai jariialady.
Osy rette Túrkistan oblysynyń ákim Ómirzaq Shókeev QR Prezidentiniń Jarlyǵyn júzege asyrý boiynsha qaýly qabyldap, birqatar sharalardy júzege asyrýdy tapsyrdy.
«Atap aitqanda, oblys aýmaǵynda infektsiianyń taralýyna jol bermeý úshin joǵary deńgeidegi daiyndyq rejimi engizildi. Barlyq jumys oryndarynda qyzmetkerlerdiń dene temperatýrasyn ólshei otyryp, qyzýy kóterilgen jaǵdaida, mindetti túrde jumystan shettetiledi. Jergilikti jerlerde iri saýda oryndary men oiyn-saýyq ortalyqtary, kinoteatr, teatr jáne ózge de adam kóp shoǵyrlanatyn oryndar qyzmetterin toqtatpaq» delingen habarlamada.
Sondai-aq, óńir basshysynyń tapsyrmasy boiynsha merekelik, sporttyq, mádeni is-sharalarmen qatar, otbasylyq toilar men qonaqasy ótkizýge tyiym salynady. Áleýmettik infraqurylym nysandaryn sanitaizerlermen jáne antiseptiktermen qamtamasyz etý, koronavirýstyń aldyn alý jónindegi jadynama taratý jumystary júrgiziledi.
Qaýlyǵa sáikes, memlekettik qorǵaýǵa alynǵan jáne halyqtyń kúnkórisi men kólikterdiń jumys isteýin qamtamasyz etetin nysandardy qorǵaýdy kúsheitý, adam kóp jinalatyn eske alý sharalaryn shekteý jóninde túsindirme jumystaryn júrgizý, áleýmettik mańyzy bar azyq-túlik baǵasyn turaqtandyrý isi de oblys ákiminiń nazarynda bolady.
Barlyq meditsinalyq uiymdarǵa koronavirýsqa qarsy sharalardy kúsheitý tapsyryldy. Qoǵamdyq kólikter ár ainalymdaǵy sońǵy aialdamada dezinfektsiialyq quraldarmen jýylyp, olardyń júrgizýshileri antiseptikter men tynys alý organdaryn qorǵaityn quraldarmen qamtamasyz etilýi tiis.
