Kórneki sýret: mkchita.ru
Túrkistan oblysynda mektep oqýshylary arasynda jappai tóbeles boldy, dep habarlaidy Otyrar.kz.
Portal málimetinshe, oqiǵa saldarynan 9 synyp oqýshysy qatty soqqy alyp, aýrýhanaǵa tústi. Jasóspirimniń bas súiegi synǵan. Sondai-aq 20 bala ustaldy. Tártip saqshylary ustalǵan 20 bala ishinen tek 1 balanyń ústinen qylmystyq is qozǵaǵan.
Qusshy ata aýylynda 60-tan astam bala tóbeles shyǵarǵan. Eldimekenniń bir jaǵy Kentaý qalasyna qarasa, ekinshi bóligi Saýran aýdanyna tiesili. Sondyqtan bolar, mundai jait jii qaitalanyp turady eken.
Bul jolǵy tóbelestiń sońy qan-josa qyrǵynǵa ulasqan. Tipti, tóbeles kezinde oqýshylar laqtyrǵan tastar kóshe boiyndaǵy úilerdi búldirgen.
Tóbeles kezinde 9 synyp oqýshysy qatty soqqy alǵan. Jasóspirimniń bas súiegi synyp ketipti. Saldarynan qan toqtamai, dárigerler ota da jasaǵan.
Foto: Otyrar.kz
Aýyldaǵy eki mekteptiń oqýshylary qaita-qaita jaǵa ustasyp qala bergendikten, mektep ákimshiligi jinalys ta ótkizgen. Alaida nátijesin bermepti. Bul joly tóbeles tún ortasynda oryn alǵan.
Qazir tergeý jumystary júrgizilip jatyr. Tártip saqshylary 10 synyp oqýshysyna qatysty qylmystyq is qozǵaǵan.
“Tergeýge 20 shaqty bala jetkizildi. Qazir tergeý júrip jatyr. Kúdikti óz kinásin moiyndap, bolǵan oqiǵa barysy anyqtalyp jatyr. Aýrýhanadaǵy balanyń basynan bir bala ǵana urǵan eken” - deidi Kentaý qalalyq PB bastyǵy Erlan Qydyrov.
Politseiler is tek ustalǵan balalarmen ǵana jabylmaitynyn jetkizdi. Aýyl jastarynan suraq-jaýap alynady. Jappai tóbeleske qatysqandar kórsetkishin arnaiy komissiia ókilderi bekitedi.
