Foto: gov.kz
Túrkistan oblysynda maqta terim naýqany bastaldy. Búgin oblys ákimi apparatynyń aptalyq májilisinde osy naýqandy sapaly uiymdastyrý máseleleri talqylandy, dep habarlaidy «Ult aqparat».
Túrkistan oblysynyń ákimi Darhan Satybaldy aýdan ákimderi men Oblystyq aýyl sharýashylyǵy basqarmasy basshysynyń esepterin tyńdap, tiisti tapsyrmalar berdi.
– Birinshiden, sharýalar men maqta qabyldaýshy zaýyttar arasynda zańdy kelisimshart bolýy tiis. Ekinshiden, maqta terimin taza ári sapaly uiymdastyrý mańyzdy. Maqta ósiriletin aýdan, qala ákimderi bul jumysty tikelei baqylaýǵa alyp, turǵyndarmen júieli jumys júrgizýi kerek. Bizdiń aldaǵy maqsatymyz – maqtanyń sapasyn kóterý, jańa tehnologiialardy engizý jáne maqta klasterin damytý. Osy baǵytta jumys jalǵasady, – dedi Darhan Satybaldy.
Oblystyq aýyl sharýashylyǵy basqarmasynyń basshysy Nurbek Badyraqovtyń aitýynsha, óńirde maqta terý jumystary júrip jatyr. Óńirde 106,4 myń gektardan 300 myń tonnadan asa maqta jinalady dep kútilýde. Aýdandarda tehnikalar men jumysshylar daiyn. Maqtanyń sapasyn kóterý, maqta zaýyttarynyń jumysyn júieleý, maqta ótkizý naryqtaryn keńeitý jáne ózge de máseleler talqylanǵan jiynda jaýaptylarǵa tiisti mindetter júkteldi.
Aita keteiik, Túrkistan oblysynda maqta sapasyn jaqsartý maqsatynda biyl jańa tásilmen 2,5 myń gektar alqapqa maqta egildi. Sheteldik tájiribe negizinde qolǵa alynǵan jańa sý únemdeý tehnologiiasy óz tiimdiligin kórsetip otyr. Jańa sý únemdeý tehnologiialary sýdy, elektr qýatyn, eńbek resýrstaryn jáne mineraldy tyńaitqyshtardy únemdei otyryp, gektarynan 60-65 tsentnerden ónim alýǵa múmkindik beredi. Bul oblystyń ortasha kórsetkishinen 2,5 esege joǵary. Jalpy óńirde maqta sharýashylyǵyn damytý boiynsha birneshe maqta – toqyma klasteri qurylady dep kózdelgen. Jobany tolyq iske asyrý nátijesinde maqta baǵasyna táýeldilik joiylmaq.
Apparat májilisinde jylytý maýsymyna daiyndyq jáne qoǵamdyq-saiasi ahýal da talqylandy. Bul jóninde Túrkistan oblysy ákiminiń birinshi orynbasary Zulpyhar Joldasov pen Túrkistan oblysy ákiminiń orynbasary Ertai Altaevtyń baiandamalary tyńdaldy. Oblysta áleýmettik nysandar men bilim, mádeniet, sport, densaýlyq saqtaý mekemeleri tiisti kómirmen qamtylýda. Jylý stantsiialarynyń daiyndyǵy da baqylaýǵa alynǵan.
