Túrkistan oblysynda kúieýi kelinshegine jumysqa temir dambal kiip barýǵa májbúrlegen. Mundai qadamǵa er adam senimsizdik pen qyzǵanyshtan barǵan kórinedi, - dep habarlaidy Tengrinews.kz tilshisi Otyrar basylymyna silteme jasap.
Basylym málimetinshe, er adam áieline álimjettik jasap, uryp-soǵyp, temirden toqylǵan ishkiim kiiýge májbúrlegen. Oqiǵa Saryaǵash aýdanyndaǵy Jibek joly aýyldyq okrýginde tirkelgen. Adam shoshyrlyq jaǵdaidy aýdandyq áleýmettik-psihologiialyq kómek qyzmeti bóliminiń basshysy Marat Taraqtiev aitty.
"Kelinshegi túngi aýysymǵa túskende kúieýi temir ishkiim kiip barýǵa májbúrlegen. Keiin jumystan úige kelgeninde sol ish kiimdi ózi sheship, adaldyǵyna kóz jetkizip otyrypty", - deidi ol.
Sondai-aq, Marat Taraqtiev óńirde mundai jaǵdailar jii tirkeletinin aitady. Jyl basynan beri 74 áiel kúieýinen álimjettik kórgenin aityp shaǵymdansa, sol Jibek joly aýyldyq okrýginiń ózinen 15 kelinshek zorlyq-zombylyq qurbany bolypty.
