Foto: Túrkistan oblysy ákiminiń baspasóz qyzmeti
Túrkistan oblysynda kúzgi jáne kóktemgi sý tasqynyna qarsy is-sharalar atqarylyp jatyr. Biylǵy 13 mamyrda bekitilgen «2024-2025 jylǵy qys-kóktemgi sý tasqynyna qarsy injenerlik is-sharalar» josparyna 39 is-shara engizilgen. Qazirgi tańda 12 is-shara tolyǵymen aiaqtalyp, 11-inde jumys jalǵasýda, dep habarlaidy «Ult aqparat».
Atalǵan máseleler oblysy ákimi Darhan Satybaldynyń tóraǵalyǵymen ótken apparattyń aptalyq májilisinde talqylandy. Óńir basshysy jaýaptylarǵa jumysty jandandyrýdy tapsyrdy.
– Oblystaǵy eldi mekenderdegi sý arnalary, kanaldar, ózender turaqty baqylaýǵa alynýy qajet. Nemquraily qaramańyzdar. Departament, basqarma, aýdan, qala ákimdikteri bir-birine siltep, máseleni aityp qana otyrsa, is ónbeidi. Birlese jumys atqaryńyzdar. «Turan sý» mekemesiniń, jergilikti azamattardyń, kásipkerlerdiń, mekemelerdiń tehnikalaryn qoldanyńyzdar. Sý tasqynyna qarsy jospar sapaly oryndalýy tiis, – dedi Darhan Satybaldy.
TO TJD bastyǵy, polkovnik Asqar Tóleshevtiń aitýynsha, aiaqtalǵan 12 is-sharanyń nátijesimen 57,5 shaqyrym qashyrtqy arnalar mehanikalyq tazalaýdan ótken. Keles aýdanynda aryq-atyzdyń 14 shaqyrymy kúl-qoqystan tazartylǵan. Saryaǵash qalasynda kanaldardyń 350 metri betondalǵan. Sairam aýdanyndaǵy Arys ózeninde 200 metr arnada túzetý jumystary júrgizildi. Saýran aýdany, Qarashyq ózenine 2 dana tospa ornatylǵan.
Qazirgi tańda sý tasqynyna qarsy jumystar jalǵasýda. Jalpy 304,1 shaqyrym aryq-atyzdar, 512,6 shaqyrymdy quraityn kanaldar, 156,7 shaqyrym diýbing-ótkelder tazalanǵan. Atalǵan jumystardy júrgizýge 131 tehnika jumyldyrylǵan. Budan bólek, sý taqyny kezeńine 84 myń dana qap pen 780 tonna inertti materialdar daiyndaldy. Tótenshe jaǵdai qaýipi týyndaǵanda tamaq men tiisti qajettilikter úshin iri kásipkerlermen 50 memorandým túzilgen.
Májiliste Túrkistan oblysynyń jumyldyrý daiarlyǵy, aýmaqtyq qorǵanys jáne azamattyq qorǵaý basqarmasynyń basshysy Sanjar Búrlibaevtyń la esebi tyńdaldy. «2024-2025 jyldarǵa kúz-kóktemgi sý tasqyny kezeńindegi tótenshe jaǵdailardyń aldyn alý is-sharalary» josparyna sáikes, eldi mekenderdiń sý tasqynyna daiyndyǵy tekserilip, akt túziledi. Tekserý jumystary qarasha aiyna deiin aiaqtalyp, qorytyndysymen tiisti usynys engizilmek.
