Búgin Túrkistan oblysynyń ákimi Janseiit Túimebaevtyń tóraǵalyǵymen oblys ákimdiginde keńeitilgen májilis ótti. Kún tártibinde kópbalaly analar men jaǵdaiy tómen otbasylarǵa kómek berý máselesi qaraldy.
Basqosýda áleýmettik sala boiynsha atqarylyp jatqan jumystar týraly oblys ákiminiń orynbasary Erbol Sadyr baiandama jasady. Málimetine sáikes, 2018 jyly "Nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan «Eńbek» Memlekettik baǵdarlamasy" sheńberinde 69,7 myń adamǵa jumyspen qamtý sharalary kórsetilgen. Onyń ishinde, 29,4 myń adam nemese 42,2 paiyzy az qamtamasyz etilgen otbasylardyń azamattary qatarynan.
"2018 jyly oblys boiynsha 34389 otbasyǵa (195 620 adam) jalpy somasy 15 mlrd. 674,5 mln.teńge kóleminde ataýly áleýmettik kómek taǵaiyndaldy. Onyń ishinde, shartty aqshalai kómek 30702 otbasyǵa (179 801 adam) 14 mlrd. 772,4 mln.teńge, al shartsyz aqshalai kómek 3687 otbasyǵa (15 819 adam) 902,1 mln.teńge. Ataýly áleýmettik kómekpen qatar az qamtylǵan otbasylarǵa turǵyn úi kómegi kórsetilýde. 2018 jyly az qamtylǵan 4367 otbasyǵa (250 09 adam) 152,3 mln. teńgege turǵyn úi kómegi kórsetildi. Jalpy áleýmettik kómek alýshylardyń qataryndaǵy kópbalaly otbasylardyń úlesi 50 paiyzǵa jýyq (16,5 myń otbasy)", - dedi E.Sadyr.
Bul jumystardyń osy jyly da jalǵasyn tabatynyn aitqan oblys ákiminiń orynbasary 2019 jyly ataýly áleýmettik kómek alýshylardyń sany 207,5 myń adamǵa josparlanyp, ataýly áleýmettik kómek boiynsha qarjy qajettiligi 13,6 mlrd.teńge quraitynyn baiandady. Onyń 50 paiyzy kópbalaly otbasylarǵa arnalǵan.
Munan soń, minberge oblystyq bilim basqarmasynyń basshysy Isatai Saǵyndyqov, densaýlyq saqtaý basqarmasynyń basshysy Muqan Egizbaev, oblystyq otbasy, balalar jáne jastar isteri jónindegi basqarmasynyń basshysy Balmarjan Narbekova shyǵyp, salalar boiynsha atqarylǵan jumystardyń barysyna toqtaldy. Saladaǵy jetistiktermen qatar, sheshimin tabýdy qajet etetin máselelerdi ońtailandyrýda usynys-pikirlerin bildirdi.
Májilis sońyn oblys ákimi qorytyndylap, óńirdegi kópbalaly otbasylar týraly naqty aqparatty daiyndaýdan bastap, olarǵa kórsetiletin memlekettik, áleýmettik kómek túrleri syndy barlyq qoldaýlardy anyqtaýdy tapsyrdy.
"Ótinish bildirgen kópbalaly analardy jumyspen qamtýǵa járdem berýdi, kedeilik sheginen tómen otbasylarǵa jergilikti biýdjet esebinen 5-10 AEK kóleminde materialdyq kómek berý múmkindigin qarastyryp, naqty usynys engizýdi tapsyramyn. Sonymen birge, mektepterge birińǵai mektep formasyn engizip, onyń ishinde kópbalaly otbasylardan shyqqan oqýshylardy tegin formamen qamtamasyz etý boiynsha naqty usynys engizilsin. Oblystyq biýdjetten sýbsidiialaý arqyly barlyq oqýshylarǵa 50 paiyz kóleminde arzandatylǵan tamaq uiymdastyrý, tamaqtaný kombinattaryn qurý boiynsha da usynystar ázirleńizder. Munan bólek, barlyq meditsinalyq mekemelerge «Kópbalaly analar kezeksiz qabyldanady» degen jarnamalar ornatýdy, barlyq aýrýhanalarda kópbalaly analarǵa arnaiy palata arnaýdy, sondai-aq osy sanattaǵy analardy zań aiasynda aýrýhanalarǵa portalsyz jáne kezeksiz qabyldaný múmkindigin qarastyrýdy jáne sanatoriilerde em qabyldaý úshin zań aiasynda joldama bólýdi qarastyrýdy, sonymen qatar, qymbat meditsinalyq qyzmetterdi kópbalaly analarǵa tegin kórsetý boiynsha múmkindikterdi qarastyryp, naqty usynys engizýdi tapsyramyn", - dedi J.Túimebaev.
Tapsyrmalarynyń ishinde aimaq basshysy memlekettik turǵyn úi qorynan úi alýǵa kópbalaly otbasylar tizimin anyqtap, birinshi kezekte úi berilý boiynsha usynys engizý jaiyn da umyt qaldyrǵan joq. Sonymen birge, atalǵan sanattaǵy analardyń qoǵamdyq kólikterde «jeńildetilgen baǵamen júrý biletterin» engizýdi nemese tegin tasymaldanýyn zańǵa sáikes qarastyryp, tiisti usynys engizýdi de jaýapty mekeme basshylaryna júktedi.
