Túrkistan oblysynda kólik nómiriniń ornyna esimin jazyp alǵan júrgizýshi jaýapqa tartyldy. Quqyqbuzýshylyqqa jol bergen turǵyn áleýmettik jelilerge monitoring júrgizý kezinde anyqtalǵan, dep habarlaidy "Ult aqparat".
Osyndai kezekti tekserý kezinde Sairam aýdanynyń politseileri qala kósheleriniń birinde artqy memlekettik nómiri turatyn orynǵa óziniń esimin qoiyp alǵan «Mersedes-Bents» markaly avtokóliktiń beinejazbasyn baiqap qalady. Kólik tizgindeýshi beinekóriniste jol boiynda basyp ozý maqsatynda qarsy baǵytqa shyqqan. Aýdandyq politsiia qyzmetkerleri avtokóliktiń iesi Aqsýkent aýylynyń turǵyny ekenin anyqtady.
«Jas jigit jol júrisi erejelerin buzǵany úshin QR ÁQBtK-niń úsh birdei babymen jaýapqa tartyldy. Olar, 590-baby 4-bóligimen «Kólik quraldaryn paidalaný qaǵidalaryn buzý», 593-baby 2-bóligimen «Jol júrisi qaǵidalarynda kózdelgen jolaýshylardy jáne júkterdi tasymaldaý, qaýipsizdik beldikterin nemese motoshlemderdi paidalaný jónindegi talaptardy saqtamaý», 596-baby 2-bóligimen «Kólik quralyn joldyń júrý bóliginde ornalastyrý, qarsy júrip ótý nemese basyp ozý qaǵidalaryn buzý». Qazirgi tańda jol júrisi qaǵidalaryn óreskel buzǵan júrgizýshige qatysty ákimshilik is aýdandyq sotqa joldandy»,- delingen habarlamada.
