Foto: Túrkistan oblysy ákiminiń baspasóz qyzmeti
Túrkistan oblysynyń ákimi Darhan Satybaldy álemge áigili ispandyq «Auditores Energeticos AFN» kompaniiasynyń ókilderimen kezdesip, óńirde kommýnaldyq qaldyqtardy tereń óńdeý zaýytyn salý jobasyn jan-jaqty talqylady, dep habarlaidy «Ult aqparat».
Qoqys qaldyqtaryn tereń óńdeýdiń jańa tehnologiiasy – qorshaǵan ortaǵa ziiansyz, Eýropa elderi qoldaǵan qaldyqsyz, qaýipsiz túri. Aita keiik, gidrogazdandyrý tehnologiiasy qoqystan jańa ónim túrlerin shyǵarady.
Jobany investor kompaniia men Qazaqstan Respýblikasynyń Úkimeti arasynda AHQO alańynda jasalatyn arnaiy investitsiialyq kelisim sheńberinde iske asyrý josparlanýda. Zańdy súiemeldeýdi «Qazaqinvest» ulttyq kompaniiasy júrgizedi.
Investorlarmen kelissózder júrgizgen óńir basshysy Darhan Satybaldy jobanyń mańyzdylyǵyna toqtalyp, ákimdik tarapynan qoldaý bolatynyn jetkizdi.
Túrkistan oblysy úshin qaldyqtardy tereń óńdeý – ekologiialyq turaqtylyqqa, ekonomikalyq ósýge jáne áleýmettik ortany jaqsartýǵa baǵyttalǵan keshendi sheshim. Qazirgi tańda oblys aýmaǵynda qatty turmystyq qaldyqtardy suryptaý jáne qaita óńdeýmen ainalysatyn 17 mekeme jumys atqarady. Onyń ishinde, 13 mekeme qaldyqtardy bólek jinaý jáne suryptaýmen (plastmassa, plastik, polietilen qaldyqtary, shyny synyqtary, tústi, qara metaldar, karton, qaǵaz, makýlatýra), 4 mekeme qaldyqtardy qaita óńdeýmen ainalysady.
Biyl 9 aidyń qortyndysymen 69 032 tonna qoqys jinaqtalyp, onyń 17 478 tonnasy qaita óńdeýge baǵyttaldy. Bul kórsetkish ótken jyly 103 181 tonnany qurady.
Oblys aýmaǵynda 135 qatty turmystyq qaldyqtar tastaityn poligon oryndary belgilengen. Onyń ishinde, 38 aýdandyq, 50 aýyl okrýginiń, 47-si jeke kásipkerge senimgerlik basqarýǵa berilgen. Oblys aýmaǵynda qoqystardy jinaý, shyǵarý jáne tasymaldaý qyzmetimen 62 mekeme ainalysady. Barlyq aýdan, qala ortalyqtarynda qurylys qaldyqtaryn tastaityn arnaiy jer telimderi belgilenip, memlekettik aktileri alanǵan. Arys jáne Túrkistan qalalarynda qorshaý jumystary júrgizilgen.
