Tuńǵysh Prezident kúnine orai dástúrli «Qazaq dastarhany» festivali ótti. Biregeilik pen birlikti, etnosaralyq kelisimdi qamtamasyz etýdi kózdegen sharaǵa óńirdegi ziialy qaýym ókilderi men «Analar keńesiniń» quramy, Qazaqstan halqy Assambleiasy oblystyq qurylymdarynyń jetekshileri men óńirdegi etnomádeni birlestikterdiń belsendi músheleri qatysty, dep habarlaidy QazAqparat tilshisi.
Barsha etnostardy qoǵamdyq bastamalarǵa uiystyrý arqyly qazaq halqynyń mańaiyna toptastyrý maqsatynda uiymdastyrylǵan sharada Túrkistan oblystyq Qazaqstan halqy Assambleiasy hatshylyǵy meńgerýshisiniń mindetin atqarýshy Madina Kamedenova oblys ákimi Janseiit Túimebaevtyń quttyqtaýyn jetkizdi. Ol «Qazaq dastarhany» festivaliniń mańyzyna toqtaldy.
«Dástúrli «Qazaq dastarhany» festivali - óńirdegi etnostar arasynda tatýlyq pen dostyqtyń aiǵaǵy. Bizdiń mindetimiz - qazaqtyń ulttyq taǵamdaryn qaita jandandyryp qana qoimai, qazaq mádenieti men ártúrli etnomádeni ortalyqtar qurý, olardy bir bastamamen biriktirý», - dedi Madina Kamedenova.
Shara barysynda ártúrli etnos ókilderi qazaq ulttyq taǵamdaryn daiyndaýǵa atsalysty. Olar et asyp, dastarhan daiyndap, qonaqtardy ulttyq dástúrmen kútip aldy. Osylaisha «Qazaq dastarhany» degendi qalai túsinetinin, saiysqa qatysýshy etnos ókilderi óz deńgeiinde kórsete bildi. Is-sharaǵa qatysqan óńir turǵyndary etnomádeni birlestikter janyndaǵy óner ujymdary daiyndaǵan kontserttik baǵdarlamany tamashalap, ulttyq taǵamdardan dám tatty.
Qazylar alqasynyń sheshimimen bas júldege oblystyq iran etnomádeni birlestigi laiyqty dep tanyldy. Birinshi oryndy Sairam aýdandyq filialy ielense, ekinshi oryn túrik jáne tájik etnomádeni birlestikterine buiyrdy. Úshinshi oryndy Tólebi aýdandyq filialy, ózbek jáne slaviian etnomádeni birlestikterine berildi. Saiys jeńimpazdaryna alǵys hattar men qarjylai syilyqtar tabystaldy.
