4 sáýirde tańerteń Qazaqstan densaýlyq saqtaý ministrligi Túrkistan oblysynda bir naýqas koronavirýstan kóz jumdy dep habarlady. 1956 jylǵy naýqas Jetisai qalasynda turǵan. Naýryz aiynyń ortasynda Almaty oblysynyń Qarasai aýdanynda qonaqta bolyp, 15 naýryzda úiine oralǵan.
26 naýryzda dene qyzýy kóterilip, dárigerlerge kóringen. Úsh kúnnen keiin jaǵdaiy nasharlaǵannan keiin infektsiialyq aýrýhanaǵa jatqyzylyp, analiz tapsyrǵan. Koronavirýs bary anyqtalǵan.
Jergilikti densaýlyq saqtaý basqarmasy ókilderiniń aitýynsha, naýqastyń diagnozynda qant diabeti, qan qysymy bolǵan. Koronavirýs pnevmoniianyń paida bolýyna túrtki bolǵan. Ol "Almatyda bolǵanyn dárigerlerden jasyrǵan" deidi basqarma ókilderi. Onymen bailanysta bolǵan 25 adam anyqtalǵan.
Túrkistan oblysynda barlyǵy 23 adamnan virýs anyqtalǵan. Koronavirýspen kúres jónindegi shuǵyl shtab dereginshe, Jetisai aýdanynda - 11, Kentaý qalasynda - 2, Arys qalasynda - 1, Maqtaaral aýdanynda - 1, Ordabasy aýdanynda - 1, Sairam aýdanynda - 2, Saryaǵash aýdanynda - 1 adamnan virýs tabylǵan. Olardyń barlyǵy buryn COVID-19 tabylǵan naýqastarmen bailanysta bolǵan. Qazir olardyń bári oqshaýlanǵan. Bul naýqastarmen bailanysta bolǵan adamdar anyqtalyp jatyr dep habarlady jergilikti densaýlyq saqtaý basqarmasy.
Shtabtyń habarlaýynsha, oblysta shekteý sharalary kúsheitilgen. Azamattardyń úiden shyǵýyna tyiym salynady. Oblysaralyq, aýdanaralyq, qalaaralyq jolaýshylar tasymaly toqtatylady. Qoǵamdyq kólikten tańerteńgi saǵat 6-dan bastap keshki 20.00-ge deiin isteidi. Barlyq azamattarǵa maska taǵý mindettelgen. Qalada zalalsyzdandyrý jumystary júredi. Azyq-túlik bazarlary tańerteńgi saǵat 10-nan bastap keshki 17.00-ge deiin isteidi. Sol siiaqty dúkenderdiń de jumys ýaqyty 20.00-ge deiin qysqarǵan.
