Foto: Gov.kz
Túrkistanda Memleket basshysynyń tapsyrmasyna sáikes, baqylaý-qadaǵalaý organdarynyń biznes-qaýymdastyq aldynda «Biryńǵai esep berý kúni» is-sharasy ótkizildi, dep habarlaidy «Ult aqparat».
Oǵan oblys ákimdigi, prokýratýra, Ekonomikalyq tergep tekserý, Sybailas jemqorlyqqa qarsy qyzmet organdarynyń basshylyq quramy men «Atameken» kásipkerler palatasy, memlekettik organdar jáne qarjylyq uiym basshylary, 100-den asa biznes ókilderi qatysty. Mańyzdy jiynda Túrkistan oblysy ákiminiń orynbasary Nuralhan Kósherov kásipkerlikti damytý óńirdegi basym baǵyttardyń biri ekenine toqtaldy.
«Memleket basshysy Qasym-Jomart Kemeluly Qazaqstan halqyna arnalǵan Joldaýynda kásipkerlikti qoldaý, kedergilerdi joiý jóninde tapsyrma berdi. Búgingi kezdesýdiń negizgi maqsaty – bilik pen biznestiń arasynda syndarly dialogty arttyrý. Biznes ókilderimen birge óńirdegi biznes-klimatty jáne investitsiialyq ahýaldy talqylaý. Shaǵyn jáne orta biznes – el ekonomikasynyń negizgi draiveri. Túrkistan – kásipkerlikke beiimdelgen, biznes ókilderi kóp shoǵyrlanǵan óńir. Búgingi tańda 210 myńǵa jýyq shaǵyn jáne orta biznes qyzmet etedi, sany boiynsha Astana jáne Almaty qalalarynan keiin 3-orynda tur. Oblys ákimdigi biznes-klimatty jaqsartý boiynsha birqatar júieli qoldaýlardy iske asyrýda. Oblysymyzda jyl basynan 4 indýstrialdy aimaq qurylyp, olardyń sany 13-ke jetti. 9 indýstrialdy aimaq infraqurylymmen qamtamasyz etilgen, jańa indýstrialdy aimaqtarǵa infraqurylym júrgizý úshin qujattamalar rásimdelýde. Sondai-aq ónerkásiptik alańy 594 gektardan turatyn «Turan» arnaiy ekonomikalyq aimaǵy bar. Ekonomikalyq aimaqta jumys isteimin degen kásipkerler tabys, keden, jer jáne múlik salyqtarynan bosatylady. Bul aimaqtardan bólek, «Óndiristik park» jobasy júzege asýda. Kásipkerler úshin daiyn óndiristik ǵimarttar jeńildetilgen sharttarmen usynylady. Saýran aýdany Shaǵa aýylynda 30 gektar jerge 39 óndiristik ǵimarattyń qurylys jumystary bastalyp, 10 ǵimarattyń qurylys jumystary aiaqtaldy. Tamshylatyp jáne jańbyrlatyp sýarý júielerin shyǵarý, jihaz tsehy, tońazytqyshtar óndirý, esik jasaý kásiporyndary óz jumystaryn bastaǵanyn atap ótken jón», dedi oblys ákiminiń orynbasary Nuralhan Kósherov.
Túrkistan oblystyq prokýratýrasynyń Qoǵamdyq múddeni qorǵaý basqarmasynyń basshysy Bolat Jumaǵaliev kásipkerlikti qorǵaý – prokýratýranyń qadaǵalaý qyzmetiniń basym baǵyty ekendigin atap ótip, investitsiialyq jobalardy súiemeldeý jóninde atqarylǵan jumystardy baiandady.
Kásipkerlik jáne ónerkásip basqarmasynyń basshysy Nurjigit Myrzahmetov biznesti jáne investitsiiany qoldaý boiynsha atqarylǵan jumystardy saralap, investitsiialyq múmkindikter týraly keńinen aityp berse, Túrkistan oblysy kásipkerler palatasy direktorynyń orynbasary Zýhra Amirova da kásipkerlikti qoldaý jóninde atqarylǵan jumystarǵa toqtaldy.
Sonymen qatar Politsiia departamenti, Memlekettik kirister departamenti, Oblystyq sanitariialyq-epidemiialogiialyq baqylaý departamenti, «Atameken» kásipkerler palatasynyń ókilderi biznesti qoldaý jáne qorǵaý jóninde baiandamalar jasap, ózekti máselelerdi ortaǵa saldy.
Basqosýda biznes ókilderi óz ótinishteri men usynystaryn aityp, qordalanǵan máselelerdi sheshý boiynsha oblys ákimdigi men quqyq qorǵaý organdarymen birlesken hattama túzildi.
