Jyl basynan beri kámeletke tolmaǵandar arasyndaǵy qylmystar 29,9%-ǵa tómendegen. Quqyq buzýshylyqtardyń aldyn-alý úshin Túrkistan oblysynda birqatar mańyzdy is-sharalar atqaryldy.
Osy jáne ózge de ózekti máseleler oblys ákimi Ómirzaq Shókeevtiń tóraǵalyǵymen ótken Túrkistan oblysy ákimdigi janyndaǵy quqyq buzýshylyq profilaktikasy jónindegi vedomstvoaralyq komissiiasy májilisinde qaraldy, dep habarlaidy "Ult aqparat" Túrkistan oblysy ákiminiń baspasóz qyzmetine silteme jasap.
Belgili bolǵandai, biylǵy jyldyń 10 aiynda atqarylǵan is-sharalar nátijesinde quqyq buzýshylyqqa beiim kámeletke tolmaǵandar jáne bala tárbiesine nemquraidy qaraityn 332 qolaisyz otbasy ishki ister organynyń esebine alyndy.
Qoǵamdyq tártip pen qoǵamdyq qaýipsizdikti qamtamasyz etý maqsatynda biylǵy jyldyń 10 aiynda kópshilik oryndardy lastaǵan, belgilenbegen oryndarda temeki tartqan, spirttik ishimdik ishken, usaq buzaqylyqtar jasaǵan azamattarǵa 6799 ákimshilik hattama toltyrylǵan. Jumys kúsheitilip, kórsetkish ótken jylmen salystyrǵanda 3 ese artqan.
Túrkistan oblysynda qoǵamdyq oryndardy, kóshelerdi jáne basqa da qylmys kóp bolatyn jerlerdi sapaly jáne zamanaýi beinebaqylaý júielerimen jabdyqtaý jumystary jalǵasady.
Qoǵamdyq rezonans týdyratyn alaiaqtyq qylmys túrleriniń biri – qarjy piramidalaryn qurý.
Ishki ister departamentiniń málimetine sáikes, biyl oblys aýmaǵynda qarjy piramidasyn qurýdyń 3 deregi anyqtalǵan.
Atap aitqanda, shamamen 1947 salymshysy bar «Gold Company LTD» (shamamen 597 mln tengege shyǵyn keltirgen) jáne shamamen 650 salymshysy bar «Milleniým» (shamamen 1,755 mlrd tengege shyǵyn keltirgen) qarjy piramida qurýshylary quryqtalyp, qylmystyq isteri sotqa joldanǵan. Qazirgi tańda osy tárizdes «Indigo-24 Evolution» qarjy piramidasyn qurýshylar anyqtalyp, sotqa deiingi tergep tekserý jumystary júrgizilýde.
