Túrkistan oblysyndaǵy kafel zaýyttarynyń birinde grek-rim kúresinen Qazaqstan chempiony Tilektes Ádil óndiristik jazataiym oqiǵadan kóz jumdy, dep habarlaidy ult.kz.
Qaiǵyly jaǵdai sportshynyń jumys ornynda bolǵan. Marqumnyń dosy taratqan aqparatqa sáikes, Tilektes Ádil jumys barysynda abaisyzda elektr symyna tiip, tok soqqannan keiin biiktikten qulap ketken. Oqiǵa ornyna jedel jetken dárigerler sportshynyń ómirin saqtap qala almaǵan.
Tilektes Ádil estý qabileti tómen sportshylar arasynda Qazaqstan namysyn qorǵaǵan belgili balýan edi.
Ol 2018 jyly Aqtóbede ótken Qazaqstan Respýblikasynyń II spartakiadasynda grek-rim kúresinen 55 keli salmaqta jeńimpaz atanǵan. Al 2019 jyly Qostanaida uiymdastyrylǵan el chempionatynda 60 keli salmaqta altyn medal ielengen.
Sonymen qatar sportshy respýblikalyq jáne halyqaralyq jarystarda birneshe ret júldeger atanǵan.
Marqumnyń artynda jary men eki balasy qaldy.
