Túrkistan oblysynda qylmyskerdi quryqtaý jolynda erlikpen qaza tapqan politseidiń qyzy áke jolyn jalǵastyryp keledi.
Oblystyq politsiia departamenti Esirtki qylmysyna qarsy is-qimyl basqarmasynyń jedel ýákili Aigúl Rysbaiqyzy er azamattarmen birge iyq tirese jumys atqarýda, dep habarlaidy QazAqparat.
Politsiia kapitany Rysbai Qudaibergenov 1984 jyldyń 9 shildesinde asa qaýipti qylmyskerdi ustaý kezinde qaza tapqan. Artynda jary Dariǵa men tórt qyzy qaldy. Úsh aidan soń dúniege Arman atty uly keldi. Al, qyzdarynyń biri Aigúl áke jolyn jalǵastyrýdy bala kúninen maqsat etken.
Ol Qazaq - Resei ýniverstetiniń zań fakýltetin bitirip, ishki ister organdarynda 2005 jyldan beri qyzmet atqaryp keledi. Kentaý qalasynda kámeletke tolmaǵandar isi jónindegi bólimniń, áielderdi zorlyq-zombylyqtan qorǵaý tobynyń, shtab tobynyń, Shymkent qalasy Ál-Farabi aýdandyq politsiia basqarmasynda aǵa inspektory qyzmetterin abyroimen atqardy. Ol búgingi kúni Túrkistan oblystyq politsiia departamentinde qyzmet etip, kóptegen qylmystyń ashylýyna jáne quqyqbuzýshylyqtyń aldyn alýǵa óz úlesin qosyp keledi.
«Politsiia qyzmetkeriniń qoǵam aldyndaǵy jaýapkershiligi joǵary. Meniń ákem Rysbai Qudaibergenov «Sovet militsiiasynyń úzdigi», «Qylmysty izdestirý qyzmetiniń tańdaýly inspektory» belgilerin keýdesine taqqan tártip saqshysy bolǵan. Ol Kentaý qalalyq ishki ister bóliminde ýchaskelik inspektor, keiinnen qylmysty izdestirý bólimi bastyǵynyń orynbasary qyzmetterin abyroimen atqarǵan. Qazirgi tańda Kentaý qalasynda ol kisiniń atyna bir kóshe berilip, eskertkish taqta ornatylǵan. El tynyshtyǵy úshin ómirin qiǵan ákemniń ósietteri maǵan qashanda qymbat. Men ákemdi maqtan tutyp, onyń atyna kir keltirmeýge tyrysamyn», - deidi Aigúl Rysbaiqyzy.
