Túrkistan oblysynyń Túlkibas aýdanynda eki jasar bala syrtqy ájethanaǵa qulap, qaitys boldy, dep habarlaidy ult.kz.
Oblystyq Tótenshe jaǵdailar departamentiniń málimetinshe, qaiǵyly oqiǵa 22 shilde kúni Aqsý-Jabaǵyly aýylynda bolǵan.
Aldyn ala aqparatqa sáikes, 2024 jyly týǵan búldirshin turǵyn úi aýlasynda eresekterdiń qaraýynsyz qalyp, abaisyzda tereńdigi shamamen 2,5 metr bolatyn syrtqy ájethanaǵa qulap ketken.
Oqiǵa ornyna Tótenshe jaǵdailar departamentiniń qutqarýshylary, jedel járdem qyzmeti, politsiia qyzmetkerleri, jergilikti atqarýshy organ men orman sharýashylyǵynyń mamandary barǵan. Qutqarýshylar balanyń denesin ájethanadan shyǵaryp aldy.
Qazir oqiǵanyń mán-jaiy anyqtalyp jatyr.
Eske salaiyq, buǵan deiin Túrkistan oblysynda balalardyń qaraýsyz qalýy saldarynan sý aidyndarynda segiz jazataiym oqiǵa tirkelgeni habarlanǵan bolatyn.
