Túrkistan oblysynyń jurtshylyǵy talantty kózi tirisinde qurmetteýdiń jarqyn úlgisin kórsetti. Qazaqstan Respýblikasy Memlekettik syilyǵynyń laýreaty jáne halyqaralyq PEN klýb, Platinaly "Tarlan" syilyqtarynyń laýreaty, belgili qoǵam qairatkeri, dramatýrg-jazýshy Dýlat Isabekovtyń týǵan jeri Ordabasy aýdany Aqjol aýylynda jazýshynyń kitaphanasy ashyldy, dep habarlaidy "Ult aqparat" "Oństústik Qazaqstan" basylymyna silteme jasap.
Qalamger týǵan jerinen ashylyp otyrǵan kitaphanaǵa Almatydan, jeke kitap qorynan 2500 dana kitap alyp kelipti.
- Biraz shyǵarmalarymdy bastap qoiyp edim. Sony jalǵastyratyn jaily oryn osy jer bolǵaly tur. Shyǵarmashylyq úiime ainalady. Aýylǵa jylyna kem degende eki ret kelýge tyrysatynmyn. Bala-shaǵamdy ertip týǵan jerdi jii tanystyryp júrmiz ǵoi. Degenmen, myna kitaphananyń, shyǵyrmashylyq úidiń jóni bólek. Túrkistan oblysynyń basshylyǵyna úlken alǵysymdy aitamyn. Kópten beri oida júrgen, biraz jyl buryn qolǵa alynǵan joba edi. Igilikti is sátimen bitip, búgin mine ashylyp otyr, - deidi qýanyshty sátte óz áserimen bólisken Dýlat Isabekov.
Arnaiy Astana, Almaty tórinen kelgen bir top aqyn-jazýshy, Túrkistan oblysynyń ziialy qaýymy qalamgerdiń osynaý qýanyshyna ortaqtasyp, saltanatty is-sharanyń sánin keltirdi.
Rýhaniiattyń bastaýynda turatyn kitaphana úiiniń ashylýynda Túrkistan oblysy ákimi Janseiit Túimebaevtyń quttyqtaý hatyn oqyp, oblys basshysy atynan syi-siiapat usyndy.
- Dýlat aǵamyz - baqytty jazýshy. Pesalary byltyr Londonda, Lordttar palatasynda qoiylǵany óz aldyna, óz elinde qanshama urpaq legin óz shyǵarmalarymen tárbielei alǵan qalamger. Dýlat Isabekovtyń «Qarashańyraq», «Beket», «Ashy bala» áńgimelerin oqyp ósken bizder úshin klassik jazýshynyń qurmetine osyndai kitaphananyń ashylý saltanatynda bolý zor qýanysh. Bul kitaphananyń Qaraspanda ashylýynyń ózi zańdylyq. Sebebi qalamgerdiń shyǵarmalaryndaǵy keiipkerlerdiń bári de osy aýyldyń turǵyndary. Óz aýyldastary. Bul kitaphanadan tóńirektegi aýyl turǵyndary rýhani azyq alyp qana qoimai, jazýshynyń ómirimen, shyǵarmashylyǵymen etene jaqyn tanysa túsedi dep oilaimyn, - dedi oblys ákiminiń orynbasary Ulasbek Sádibekov.
Rasynda da qalamgerdiń shyǵarmalarymen qatar, marapattary, túrli kezdesýler men saltanatty sharalardan syr shertken sýretteri qoiylǵan kitaphana úii rýhani ortalyqqa ainalary sózsiz. Munda kez kelgen oqyrmanǵa jazýshymen syrlasyp, ádebietpen tanysyp, kitappen dos bolýǵa bar múmkindik jasalǵan.
Saltanatty sharada sóz alǵan belgili jazýshy Beksultan Nurjekeev «Igi isterdiń bári de Ońtústik óńirinen bastalatynyna taǵy bir kóz jetkizip otyrmyn. Jazýshysyn qurmetteý degen osyndai-aq bolsyn. Rýhani jańǵyrý degen - osy. Ulttyń ustyny bola bilgen azamattardy ólgen soń «arysymyz edi, batyrymyz edi...» dep jatamyz. Qurmetti osylai kózine kórsetip, ózi barda batasyn alyp jasaǵan durys» dedi.
Halyqaralyq «Alash» syilyǵynyń laýreaty Marhabat Baiǵut «meni ádebiet álemine ákelgen Dýlat Isabekov» dese, filolog ǵalym, ádebiet synshysy Qulbek Ergóbek qalamgerdi qurmettep týǵan aýylynan osyndai kitaphana ashyp berip otyrǵan oblys ákimine, nysannyń qurylysyn júrgizýge septigin tigizgen Arys jáne Ordabasy aýdandarynyń ákimderine alǵysyn aitty.
Kitaphananyń ashylý saltanatynda belgili aqyndar Qasymhan Begmanuly, Qazybek Isa óleń oqydy. Jiylǵan kópshilik osylaisha ádebi keshke tatyǵan jiynnyń kýási boldy. Jańadan ashylyp otyrǵan kitaphananyń rýhani ortalyqqa ainala bastaǵany da osy emes pe?!
