Foto: Otyrar.kz
«Juldyz» indýstriialyq aimaǵynda «Coca-Cola» óndiretin jańa zaýyt ashyldy. Kásiporyn Coca-Cola İçecek A.Ş kompaniiasyna tiesili. Munda búkil álemge tanymal sýsyn, sonymen qatar salqyn shái men gazsyz sý shyǵarylady. Óndiris orny qazir 150 adamdy jumyspen qamtyp otyr, dep habarlaidy «Ult aqparat» otyrar.kz-ke silteme jasap.
16 gektar aýmaqty alyp jatqan kásiporyn eki óndiristik jelimen jabdyqtalǵan. Ashylý saltanatyna megapolis basshysy, Túrkiia men Amerika Qurama Shtattarynyń bas konsýly jáne kompaniianyń seriktesteri qatysty. Barsha qonaqtar aldynda biregei óndiris orny iske qosyldy.
Zamanaýi óndiris oshaǵyn ashýǵa kásipker 27 milliard teńge investitsiia salǵan. Qazir kásiporynda 150 jergilikti turǵyn turaqty jumyspen qamtyldy. Zaýytta salqyn shái, sý, gazdalǵan sýsyndar jáne koka-kola shyǵaratyn eki óndiristik jeli jasaqtalǵan. Munda qorshaǵan ortaǵa ziian keltirmeý úshin ozyq tehnologiialar qoldanylady.
«2 jelide 283 million litr sý shyǵarady. Osynda 150-dei adam jumysqa ornalastyrdyq. Nysannyń investitsiia quny 30 mlrd teńge. Bári jaqsy bolsa, kelesi jyly taǵy jańa jeli qosamyz», — deidi Ortalyq Aziia jáne Kavkaz elderi boiynsha korporativtik kommýnikatsiialar direktory Alima Isembaeva.
Sonymen qatar, jobada qala turǵyndaryna paidasy tietin innovatsiialyq bastamalar men damý baǵdarlamalary engiziledi. Zaýyttyń ashylýy Qazaqstan men Túrkiia arasyndaǵy uzaq merzimdi jáne tyǵyz yntymaqtastyqty damytýǵa tyń serpin bermek.
«Osyndai tamasha zaýyttyń ashylýyna kelgenime óte qýanyshtymyn. Onyń ashylýy túrik investorlarynyń bul aimaqqa investitsiia salýǵa degen qyzyǵýshylyǵyn rastaidy. Bul eki el arasyndaǵy yntymaqtastyqty ornatý jolyndaǵy mańyzdy kezeń. Zaýyttyń iske qosylýy Túrkiia men Qazaqstan arasyndaǵy saýda-sattyq pen dostyq qarym-qatynasty jaqsartýdaǵy mańyzdy oqiǵa sanalady», — deidi Túrkistandaǵy Túrkiianyń bas konsýly Ilker Pak.
Bul Túrkiianyń jetekshi konglomeraty Anadolu Group enshiles uiymy Coca-Cola İçecek A.Ş-tyń Qazaqstandaǵy úshinshi zaýyty. Kompaniia 12 elde óz filialyn ashqan. onda 33 bótelke quiý jáne 3 jemis óńdeý zaýyty bar. Al elimizde 13 myńnan astam adamdy turaqty jumys ornymen qamtamasyz etip otyr.
