Foto: Túrkistan oblysynyń Óńirlik kommýnikatsiialar qyzmeti
Biyl jartyjyldyqtyń qorytyndysymen óńirge tartylǵan investitsiialar kólemi 420,8 mlrd teńgeni qurap, ótken jyldyń tiisti kezeńimen salystyrǵanda 137,8%-ǵa ósti. Al, jalpy 2024 jyly quny 151,9 mlrd. teńgeni quraityn 2 406 jańa jumys ornymen 62 investitsiialyq jobany iske asyrý josparlanýda, dep habarlaidy «Ult aqparat».
Bul jaiynda búgin Túrkistan oblystyq kásipkerlik jáne ónerkásip basqarmasynyń basshysy Nurjigit Myrzahmetov málimdedi.
«Óńirge investitsiia tartý jumystaryn kúsheitý úshin aýdan jáne qala ákimdikteri, biznes ókilderimen birlese ótken jyly shet elderge is-saparlar uiymdastyryldy. Nátijesinde oblys ekonomikasyna shamamen 1,2 trln teńge investitsiia baǵyttalatyn boldy. Iri jobalardyń qatarynda toqyma klasterin qurý boiynsha «Lihýa Grýpp» kompaniiasy bar. Atalǵan kompaniia oblysta qubyr jáne tamshylatyp sýarý júielerin óndiretin zaýyt, 2 maqta óńdeý zaýytyn, jip iirý, boiaý jáne árleý fabrikasyn, tigin fabrikasy siiaqty investitsiialyq jobalardy iske qosýdy josparlaýda. Biyl Qytai, Túrkiia jáne Koreia elderine is-saparlar uiymdastyryldy. Sapar aiasynda oblystyq delegatsiia mańyzdy jobalardy júzege asyrý, IT salasynda tájiribe almasý, aýyl sharýashylyǵy salasyn damytý, ozyq tehnologiiamen qamtý, tereń óńdeý, bilim, mádeniet, týrizm, Túrkistan qalasyndaǵy áýejaidyń logistikalyq áleýetin paidalaný, áýe reisin ashý jáne ózge de máselelerde áriptestik ornatý boiynsha kelissózder júrgizdi», - dedi basqarma basshysy.
Budan bólek, oblystyń ónerkásip salasynda biyl ónim kólemin 1 trln 120 mlrd teńgege jáne óńdeý ónerkásibi ónimi kólemin 510 mlrd. teńgege jetkizý josparlanyp otyr. 2024 jyldyń 6 aidyń qorytyndysymen salada 551,6 mlrd. teńgege ónim óndirilip, ótken jyldyń tiisti kezeńimen salystyrǵanda 106,8%-ǵa ósken. Qazirgi ýaqytta oblysta 1 003,2 gektardy quraityn 13 indýstrialdy aimaq jáne 580 gektar aýmaqta arnaiy ekonomikalyq aimaqtar bar. Bul aýmaqtarda 53 kásiporyn jumys isteidi. Biyl qosymsha 30 jobanyń qurylys jumystary júrgizilip jatyr.
