Politseiler Túrkistan oblysynda eki blogerdiń ustalǵan sáti túsirilgen videony jariialap, qylmystyq istiń jai-japsaryn málimdedi.
Ishki ister ministrliginiń Telegram-daǵy resmi arnasyna jariialanǵan aqparat boiynsha, Túrkistan oblystyq PD uiymdasqan qylmysqa qarsy kúres basqarmasynyń jáne Sairam aýdandyq politsiia basqarmasynyń qyzmetkerleri bopsalaýdyń birneshe faktisine qatysy bar eki blogerdi anyqtaǵan.
Kúdiktilerdiń uzaq ýaqyt boiy Sairam aýdanynyń aýmaǵyndaǵy túrli uiymdardyń basshylaryna qoqan-loqqy jasap, aqsha bopsalaýmen ainalysqany anyqtaldy. Olar jábirlenýshiniń iskerlik bedeline nuqsan keltiretin málimetterdi taratpas úshin aqsha alyp turǵan sátte ustaldy. Qazir qylmystyq is qozǵaldy, - dep málimdedi IIM ókilderi.
Ustalǵandar qamaýǵa alynyp, zattai dáleldemeler tárkilengen. Vedomstvonyń málimetinshe, kúdiktilerdiń biri buryn sottalǵan.
Buǵan deiin Túrkistan oblysynyń prokýratýrasy da bopsalaý arqyly aqsha talap etý faktisi boiynsha eki adamnyń ustalǵanyn habarlaǵan bolatyn.
Atap aitqanda, A. jáne E. esimdi belsendi blogerler aýdandaǵy bir mektep direktorynan Facebook áleýmettik jelisinde iskerlik bedeline nuqsan keltiretin jariialanymyn joiý úshin 100 myń teńge talap etken, - delingen prokýratýra habarlamasynda.
