Túrkistan oblysynda barlyq baǵyttaǵy joldar ashyldy, dep habarlaidy QazAqparat tilshisi.
Oblystyq TJD bastyǵynyń orynbasary Erik Sarybaevtyń aitýynsha, óńirde úzilgen elektr jelileri qalpyna keltirilgen. Sóitip 30-dan asa eldi mekendegi turǵyndarǵa jaryq berilgen. Dese de keshegi qatty borannyń saldarynan áli de Túrkistan qalasy men Báidibek, Sozaq, Sairam jáne Tólebi aýdandaryndaǵy 25 eldi mekende 5 myńǵa jýyq abonent jaryqsyz otyr. Apat saldaryn joiýǵa jaryqqa jaýapty mekemeniń 11 brigadasyndaǵy 50-ge jýyq maman men 12 arnaiy tehnikasy jumyldyrylǵan. Jolda qalǵan jeńil jáne júk kólikteriniń júrgizýshilerine de tiisti kómekter berilgen. Alaida aýa raiyn boljaityn mekeme mamandarynyń habarlaýynsha aldaǵy kúnderi óńirde taǵy da aýa raiy ózgerýi múmkin. Sondyqtan mamandar júrgizýshiler men jolaýshylarǵa jolǵa shyqqanda abai bolýdy eskertedi.
«18 qarasha kúni túnde de Túrkistan oblysynyń taý bókterli aýdandarynda qatty jaýyn-shashyn, jańbyr, qar, oblystyń soltústiginde, batysynda, ońtústiginde shańdy daýyl kútilýde. Oblystyń basym bóliginde jeldiń jyldamdyǵy 15-20 metr sekýnd, oblystyń taýly aýdandarynda 23-28 sek, al taýlardaǵy asýlarda 30 metr sek deiin jetýi yqtimal», - deidi Erik Sarybaev.
