Túrkistan oblysynda arystai uly kisi qolynan ajal qushqan otbasy, ádildik izdeidi. Sairam aýdany Aqbastaý aýylynyń turǵyndary onyń ólimine kinálilerdiń túgel jazalanýyn talap etip otyr, dep habarlaidy KAZ.NUR.KZ saity Astana arnasyna silteme jasap.
27 jastaǵy Elaman jaqynda kelin ákelem dep úiin qýantyp ta qoiypty. Biraq ol kúnge jete almai ketken. Marqum 2 qarasha kúni "jalaqy aldym, monshaǵa túsip, shash qidyryp kelemiz" dep synyptastarymen ketken. Sodan oralmaǵan.
Ol qarashanyń ekisinen úshine qaraǵan túni bolǵan tóbelesten keiin aýrýhanaǵa túsip, eki kún jatyp, esin jimastan kóz jumǵan.
Ózegi órtengen anasynyń aitýynsha, tepkiden bas súiegi qaq airylyp, miy ezilgen. Bilýinshe, eregis bolmashy sózden shyqqan.
"Baǵa týraly sál kelispei qalǵanda. Sosyn bulardyń kiremiz dep turǵan ornyna basqa bireýdi kirgizip jibergen, soǵan ashýlanǵan da balalar. Onda da ózderi balaǵattap bastaǵan, sosyn bular da sál eregisken. Eregisten bulardy syrtqa alyp shyǵyp, qaqpany jaýyp qoiyp urady ǵoi", - deidi marqumnyń anasy Sholpan Malikova.
Týystarynyń bilýinshe, tórt jigitke áýeli alty adam jabylǵan. Olar kúzet qyzmetindegiler deidi jaqyndary. Keiinnen sany 15-ten asypty. Taiaq jegen kýágerler syrttan jigitter kelgenin aitqan.
Al marqum Elamandy sol jerden kezdeisoq ótip bara jatqan meditsina qyzmetkerleri aýrýhanaǵa jetkizgen eken.
Bul iske qatysty jaýap bergen politsiianyń málimetinshe, qazir bir kúdikti anyqtalyp, ol "úiqamaqqa" alynǵan.
"2021 jyly Sairam aýdany aýyldarynyń birinde ornalasqan demalys kompleksine oryn alǵan jaitqa bailanysty, Sairam APB-de QR QK-niń 106-baby "Densaýlyqqa qasaqana aýyr ziian keltirý" boiynsha tirkeýge alynǵan. Sotqa deiingi tergeý amaldary júrgizilýde. Sairam aýdandyq sotynyń qaýlysymen kúdikti "úiqamaqqa" alynǵan. Oqiǵanyń tolyq mán-jaiy tergeý barysynda anyqtalatyn bolady", - deidi Túrkistan oblystyq politsiia departamentinen.
Degenmen, qara jamylǵan otbasy tóbeleske qatysqandardyń barlyǵyn qamaýǵa alýdy talap etip otyr. Olar tipti, kúdiktiniń "úiqamaqqa" alynǵanyn túsinbei dal.
"Adam ólimi bolyp jatyr. (...). Qai jerde kórdiń adam óltirgen adamdy úi qamaqqa alǵanyn?! Men oilaim bir úlken dókeiler aralasyp jatyr dep.. Endi shynymdy aitsam aqshamen jaýyp tastap jatqan siiaqty", - deidi marqumnyń anasy Sholpan Malikova.
A. Tórebekqyzy
