Foto: primeminister.kz
10 maýsym kúni Úkimette Premer-Ministrdiń orynbasary Serik Jumanǵarinniń tóraǵalyǵymen ótken ortalyq jedel shtab otyrysynda óńirlerdegi ótken demalys kúnderindegi shegirtkeniń taralýyna qatysty jaǵdai talqylandy. Bul týraly Úkimettiń baspasóz qyzmeti habarlady.
Belsendi taralý kezeńinde ziiankestermen kúrestiń árbir kúni óte mańyzdy. Sondyqtan ortalyq jedel shtab aptasyna eki ret otyrys ótkizýge kóshti. Barlyq óńirler qarqyndy jumys rejiminde: ahýal únemi baqylaýǵa alynǵan jáne óńdeýdi kúsheitý qajet jerlerge tehnika men pestitsidterdiń qosymsha kólemi dereý jetkizilýde.
Túrkistan oblysynda aptap ystyq pen shegirtkeniń qosymsha 60 myń gektar alqapqa taralýy jaǵdaidy qiyndatyp otyr. 10 maýsymdaǵy jaǵdai boiynsha onyń 45,3 myń gektary óńdeldi: Arysta – 36,8 myń gektar, Shardara aýdanynda – 6,7 myń gektar, Keles aýdanynda – 1,6 myń gektar.
Premer-Ministrdiń orynbasary Serik Jumanǵarin uiymdastyrý jumystaryn jedel basqarý úshin Jetisý oblysyna, aýyl sharýashylyǵy ministri Aidarbek Saparov Túrkistan oblysyna, aýyl sharýashylyǵy vitse-ministrleri Qostanai jáne Aqtóbe oblystaryna jumys saparymen barady.
Sondai-aq Aýyl sharýashylyǵy ministrliginiń 46 qyzmetkeri Túrkistan oblysyna issaparǵa jiberildi, olar óńdeýge tiisti jerlerdi anyqtaý maqsatynda aýmaqtardy zertteýde. Ziiankesterdiń taralý aimaqtary anyqtalǵan jaǵdaida himiialyq zattardyń eki eselengen dozasymen qaita óńdeý jumystary júrgiziledi.
