Almatydaǵy jappai tártipsizdikke qatysy bar 5 kúdikti Túrkistan oblysynda ustaldy. Qazir olarǵa qatysty sotqa deiingi tergeý amaldary júrgizilip jatyr, dep habarlaidy QazAqparat.
Politseiler Jetisai qalasynda jedel is-sharalar júrgizý barysynda qonaqúidiń birinen Almaty men Túrkistan oblystarynyń úsh er adamdy ustady. Olardyń ekeýi buryn urlyq úshin sottalǵandar.
Tártip saqshylary olardan 550 000 teńge aqsha, esirtki, erler men áielderdiń brend zattaryn tárkiledi.
Sondai-aq, Túrkistan qalasyna kire beristegi Yntymaq blok beketinde eki kúdikti qolǵa tústi. Politseiler olardyń júkterinen Nikon jáne Canon fotoapparattarynyń jiyntyǵyn, altyn áshekeiler, Samsung markaly 2 jáne iPhone -12 markaly bir telefon, 1 noýtbýk pen eki jańa krossovka tárkiledi.
Belgili bolǵandai, olar 5 qańtar kúni jappai tártipsizdik barysynda Almaty qalasyndaǵy Tóle bi kóshesinde ornalasqan «Tehnodom» dúkenine kirgen. Sodan keiin ǵimaratta turǵan er adamdy uryp, tehnika quraldaryn, altyn men aiaqkiimdi alyp ketken.
Kúdiktiler Túrkistan oblysyna qalaaralyq avtobýspen kelgen. Túrkistan qalasyna kireberiste komendant saǵatyn eskere otyryp, júrgizýshiden toqtaýdy suraǵan jáne qarańǵyny paidalanyp, jaiaý júrip ótpekshi bolǵan.
Búginde kúdikti bes adamǵa qatysty QR QK 191-baby «Tonaý» boiynsha sotqa deiingi tergeý amaldary júrgizilýde. Barlyǵy qamaýǵa alyndy. Qazirgi kezde Túrkistan oblysynyń tergeýshileri olardyń Almaty qalasynda qandai maqsatta bolǵanyn anyqtaýda.
