Túrkistan oblysynda bildei bir aýdan ákimi aýla sypyrýshylar men qoqys tazalaýshylardyń monshaǵa túsip, taza bolyp júrýin óz baqylaýyna aldy, dep habarlaidy Sputnik Qazaqstan tilshisi.
Tólebi aýdanynyń ákimi Buqarbai Parmanov mundai qadamǵa ne sebepti barǵanyn bylaisha túsindirip berdi:
"Biz birinshi tazalyqqa kóp kóńil bóldik. Kommýnaldyq saladaǵy jumysshylardyń kóbi jaǵdaiy tómen otbasylardyń adamy. Alǵan jalaqysy kiimine, keide tamaǵyna jetpeidi. Oǵan bala-shaǵasyn qosyńyz. Qarasam, shashtary ósip ketken, jaǵdailary joq. Kommýnaldyq mekemedegi jumysshylardyń ailyǵyn eki esege kóbeitip, tipti jumys barysynda bir mezgil ystyq tamaq beretin jaǵdai jasadyq. Arnaiy bólme qarastyrdyq, sebebi qys mezgilinde kiimderin keptirip alyp, shaiyn iship, tynyǵýy qajet. Oǵan qosa mekeme esebinen olar aptasyna bir ret monshaǵa túsedi, aiyna bir ret shashtarazǵa barady. Biz jumysty talap etý úshin aldymen jaǵdai jasaýymyz qajet".
Suhbat barysynda Tólebi basshysy aýdannyń tazalyǵyna jaýapty mekeme tehnikadan tarshylyq kórip otyrǵan joq dep aǵynan jaryldy. Aldaǵy ýaqytta bul mekemelerdi jekeniń qolyna ótkizip, jumysshylardyń jalaqysyn taǵy da kóterýdi josparlap otyr.
Buqarbai Parmanov bul qyzmetke 2016 jyldyń tamyzynda keldi. Oǵan deiin kommýnaldyq salanyń qarapaiym jumysshylary 30 myń teńge jalaqy alyp kelgen bolsa, búginde olardyń tabysy 60-70 myń teńgeni qurap otyr. Aýdan boiynsha tazalyqqa jaýapty 100-ge jýyq jumysshy tynbai eńbek etip keledi.
Jumysshylardyń taza bolyp júrýine alańdaǵan sheneýnik bul jaǵdai ármen qarai jalǵasa beretinin jetkizdi.
"Tehnikasy, basqasy bar. Osynyń barlyǵymen qamtamasyz etip, tazalyqshylardyń kóńiline qarap jumys jasap jatyrmyz. Olar qazir de monshaǵa, shashtarazǵa mekeme esebinen baryp júr. Ony toqtatpaý kerek, bir ret jasasań kózboiaýshylyq bolady", — dedi Tólebi aýdanynyń basshysy.
