Túrkistan oblysynda 50-den asa páter urlyǵyna qatysy bar kúdikti ustaldy, - dep habarlaidy Polisia.kz.
Qazyǵurt APB-nyń kezekshi bólimine jergilikti turǵyn aryzdanǵan. Jábirlenýshi áieldiń aitýynsha, onyń úiine túngi ýaqytta ury túsip, shkaf ishinde turǵan altyn buiymdary men bir million teńgeden asa aqshasyn jymqyrǵan. Jábirlenýshige keltirilgen shyǵyn kólemi úsh million teńgeden asady.
Bul derekti politsiia qyzmetkerleri QR QK-niń 188-baby ("Urlyq") boiynsha SDTBT-ǵa tirkep, páter tonaýmen ainalysqan belgisiz adamdy izdeýge jáne ustaýǵa kirisken.
"Túrkistan oblysy PD Kriminaldyq politsiia basqarmasynyń qyzmetkerleri men Qazyǵurt APB politseileri Túrkistan oblysynyń birneshe aýdanynda jasalǵan 50-den asa páter urlyǵyna qatysy bar tonaýshyny ustadyq. Kúdikti er adam úilerdiń plastik terezesin buzyp ashyp, bólmelerdegi aqsha men altyn buiymdardy jymqyrǵan jáne urlanǵan bótenniń múlkin Shymkent qalasyndaǵy lombardtarǵa ótkizip otyrǵan. Al aqshasyn óz qajettiligine jumsaǵan", - dedi Túrkistan oblysy PD bastyǵynyń orynbasary Qurmanbek Sahov.
Qylmysty ashý maqsatynda Túrkistan oblysy PD KPB-nyń tájiribeli jedel ýákilderi men qazyǵurttyq politseilerden jedel-tergeý toby qurylǵan.
"Páter urysyn ustaý baǵytynda jan-jaqty izdestirý sharalaryn iske asyrdyq. Qylmysty ashý baǵytyndaǵy arnaiy is-sharalar júrgizildi. Kýálardan jaýap alynyp, kórgen-bilgenderden surastyrý jumystary atqaryldy. Osylaisha túrkistandyq tártip saqshylarynyń qyraǵylyǵy men kásibi sheberligi nátijesinde, kúdiktiniń jeke basy anyqtaldy. Ol buryn páter urlyǵymen sottalǵan Shymkent qalasynyń turǵyny bolyp shyqty. Iaǵni, kúdikti óziniń burynǵy sottylyǵyna qaramastan, qaita qylmysqa barǵan. Úirenip qalǵan teris áreketin jalǵastyrǵan ury Túrkistan oblysynyń Qazyǵurt, Keles, Saryaǵash, Ordabasy aýdandarynda sońǵy úsh jyl, iaǵni 2020, 2021, 2022 jyldar aralyǵynda 50-den astam úige urlyqqa túskenin moiyndady. Ońai jolmen oljaly bolamyn dep oilaǵan kúdikti atalǵan aýdandarǵa túngi ýaqytta baryp, eshkim joq úilerge terezesin buzyp kirgeni anyqtalyp otyr. Sodan tek altyn men aqshalardy qoldy etip, oqiǵa ornynan boi tasalaǵan. Qazirgi ýaqytta atalǵan jaittar boiynsha sotqa deiingi tergeý amaldary júrgizilýde. Kúdikti qamaýǵa alyndy. Aiǵaqty zat retinde urlanǵan altyndardyń bir bóligi tárkilenip, zańdy ielerine qaitaryldy. Politsiia kúdiktiniń basqa da osyǵan uqsas qylmystarǵa qatystylyǵyn jáne onyń sybailastarynyń bar-joǵyn anyqtaidy", – dedi brifingte Qurmanbek Sahov.
