Túrkistan oblysynda qazir 400-ge jýyq dáriger, orta jáne kishi býyn meditsina qyzmetkerleri kúndelikti qaýip-qaterdiń ortasynda adam ómirine arasha túsip, koronavirýs indetimen kúresýde, dep habarlaidy "Ult aqparat" oblys ákiminiń baspasóz qyzmetine silteme jasap.
Naýqastarǵa táýlik boiy meditsinalyq em kórsetip júrgen «Jetisai aýdandyq infektsiialyq gospitaldyń» meńgerýshisi Zamira Tashimova áriptesteriniń bir kisidei kúresip, kómekke qosymsha dárigerler jumyldyrylyp jatqandyǵyn aitady. 30 jyldan astam tájiribesi bar infektsionist ózi de elde tótenshe jaǵdai jariialanǵaly beri kúndiz-túni aianbai jumys isteýde.
«Táýlik boiy aýrýhanada koronavirýsqa shaldyqqan naýqastardy qolymyzdan kelgenshe emdep jatyrmyz. Árine, ol azamattardyń qinalǵanyn kórgende júregimiz aýyrady. Biraq, qiyn sátte barynsha bekem bolyp, tabandylyq kórsetýimiz qajet ekenin túsinemiz. Jetisai aýdandyq infektsiialyq gospitalda kerek nárseniń barlyǵy bar. Óz tarapymyzdan da barlyq saqtyq sharalaryn qadaǵalaýdamyz. 14 kún saiyn tekserilip, koronavirýs indetine synama tapsyramyz», - deidi Zamira Tashimova.
Al, Túrkistan qalalyq ortalyq aýrýhanasy juqpaly aýrýlar bóliminiń karantin rejiminde jumys istep jatqan dárigerleri óz taraptarynan halyqqa arnaǵan keńesterine túsinistikpen qaraýǵa shaqyrady.
«El amandyǵy úshin úide qalyp, saqtyq sharalaryn qadaǵalaý qajet. Óńirge qaýipti aimaqtardan kelgen azamattar jergilikti emhanaǵa habarlasyp, 14 kúndik karantinde bolýlary tiis. Qazirgidei qiyn sátte myńdaǵan adamnyń qaýipsizdigi, bir adamnyń jaýapkershiligine bailanysty bolǵan kúige tústik. Sol sebepti ár azamatpen jeke túsindirme jumystaryn da júrgizemiz», - deidi eki aptadan beri úi betin kórmegen Túrkistan oblystyq qoǵamdyq densaýlyq basqarmasynyń shtattan tys infektsionist-dárigeri Zamira Jorabekova. Dáriger kúni-túni provizorlyq statsionarda qyzmette. Otbasymen qaita qaýyshatyn kúndi armandaidy. Úide kúieýimen 2 ul, 1 qyzy kútip otyr. Kishkentaiynyń jasy 7 –de. Óz ómirlerin báske tikken osyndai dárigerlerdiń eńbegi eren.
Jalpy, oblys boiynsha koronavirýs infektsiiamen aýyrǵan naýqastardy jatqyzý úshin 150 tósek-oryn jasaqtalǵan. Pandemiialyq indetke uqsas klinikasy bar naýqastardy jatqyzyp, diagnozyn anyqtaý maqsatynda 510 tósek orynǵa provizorlyq gospital qarastyrylǵan. Odan bólek barlyq aýdandar men qalalardaǵy infektsiialyq aýrý bólimderi daiyn. Qarym-qatynasta bolǵandardy oqshaýlaý úshin oblys aýmaǵyna 955 tósek orynǵa karantin ortalyqtary ashylǵan.
