Qazirgi tańda Túrkistan oblysy Maqtaaral aýdanynyń 4 eldimekeni sý astynda qalǵan, dep habarlaidy "Ult aqparat" oblys ákimdigine silteme jasap.
Atap aitqanda Jańaturmys (46 úi), Jeńis (130 úi), Firdoýsi (250 úi) jáne Órgebas (194 úi) aýyldaryn sý basqan. Jalpy 620 úige zaqym kelgen.
Turǵyndardy kóshirý úshin 22 evakýatsiialyq oryn daiarlanǵan. Búgingi kúni bul oryndarǵa ornalasqan adam sany 7000-ǵa jýyq.
Evakýatsiialyq bólimderde turǵyndardy 120 meditsina qyzmetkeri tekserýden ótkizip jatyr. Politsiia qyzmetkerleri Jeńis, Jańaturmys, Firdoýsi, Órgebas eldi mekenderine 5 blokpost qoiyp, qaýipsizdikti qamtamasyz etýde.
Sonymen qatar, kórshiles Jetisai aýdany Qoǵaly eldi mekeninde qaýipsizdikti kúsheitý maqsatynda 5 tehnika, 508 adam jumyldyrylǵan.
«Jaǵdai turaqty baqylaýda, barlyq qajetti kómek ýaqtyly kórsetilip jatyr» dep málim etti oblys ákiminiń baspasóz qyzmeti.
