Erte júktiliktiń aldyn alý maqsatynda óńirde «Reprodýktivti densaýlyqty saqtaý» aptalyǵy ótip jatyr. Bul týraly Túrkistan oblysy Densaýlyq saqtaý basqarmasy basshysynyń orynbasary Baýyrjan Satybaldy Túrkistan óńirlik kommýnikatsiialar qyzmetinde ótken brifingte málimdedi.
Aptalyqtyń basty maqsaty – halyqtyń reprodýktivti densaýlyq máseleleri týraly aqparattandyrý, salaýatty ómir saltyn nasihattaý jáne urpaqty bolý júiesimen bailanysty aýrýlardyń aldyn alý. Aptalyq aiasynda aqparattyq-túsindirý is-sharalary, densaýlyq saqtaý ortalyqtarynda ashyq esik kúnderi, jasóspirimderge arnalǵan tegin meditsinalyq tekserýler men keńester uiymdastyrylady.
Brifingte QR Prezidentiniń janyndaǵy áielder isteri jáne otbasylyq-demografiialyq saiasat jónindegi ulttyq komissiia múshesi Nazym Janǵazinova ata-ana men bala arasynda josparlanbaǵan júktilik jóninde ashyq áńgime bolýy kerektigin aityp, ult bolashaǵyna jaýapkershilikpen qaraýǵa shaqyrdy. Al Túrkistan oblysy Densaýlyq saqtaý basqarmasy basshysynyń orynbasary Baýyrjan Satybaldy Túrkistan oblysy týý kórsetkishi boiynsha elimizdegi kósh bastap kele jatqanyn jetkizdi.
«Ótken jyly óńirde 56 myńǵa jýyq náreste dúniege kelse, osy jyldyń alǵashqy 5 aiynda 20 myń 859 sábi dúnie esigin ashyp otyr. Ana men bala densaýlyǵy – el bolashaǵynyń jarqyn bolýynyń negizi. Búgingi tańda oblysymyzda 500 myńǵa jýyq bala týýǵa qabiletti jastaǵy áielder bar. Onyń ishinde 28 myńnan astam áiel júkti bolyp tirkelgen. Sonymen qatar 182 jasóspirimniń júktiligi tirkelip otyr. Jyl saiyn Qazaqstanda jatyr moiny obyrynyń 1900-ge jýyq jańa jaǵdaiy anyqtalyp, 600-ge jýyq áiel osy dertten kóz jumady. Reprodýktivti densaýlyqty qorǵaý aptalyǵy aiasyndaǵy jumystar halyq densaýlyǵyn nyǵaitýǵa septigin tigizedi degen úmittemin», - dedi Baýyrjan Satybaldy.
