Túrkistan oblysynda 1777 oqýshynyń sabaǵy onlain formatqa kóshirildi. Bul týraly oblystyq SEBD baspasóz qyzmeti málimet taratty, dep habarlaidy QazAqparat.
Departamenttiń málimetinshe, jańa oqý jyly bastalǵanan beri 16 qyrkúiekke deiin oblysta 31 muǵalim, 108 oqýshy koronavirýs infektsiiasyna shaldyqqan. Naýqastanǵan oqýshylardyń 26-y offlain formatta sabaqqa qatysqandar bolsa, qalǵan 74 oqýshy indetti jazǵy demalys kúnderi juqtyrǵan. Epidemiiaǵa qarsy is-sharalar barysynda naýqastarmen qarym-qatynasta bolǵan 1777 oqýshy, 71 synyp 14 kúndik úi karantinine oqshaýlanyp, oqýlary onlain formatqa kóshirildi. Sondai-aq, oblysta 934 bilim berý uiymy 100% «ASHYQ» baǵdarlamasyn engizilgen. Sanitariialyq-epidemiologiialyq baqylaý basqarmalary jańa oqý jyly qarsańynda «ZOOM» platformasy arqyly mektep direktorlary men meditsina qyzmetkerleri arasynda koronavirýstyq infektsiianyń aldyn-alý boiynsha seminarlar ótkizgen.
«Koronavirýstyq infektsiianyń taralýyn boldyrmaýǵa baǵyttalǵan aqparattyq-túsindirý jumystary jalǵastyrylýda. QR BMSD Qaýlysyna sáikes, jaýapty qyzmetkerler barlyq pedagogtarǵa, personal men bilim alýshylarǵa bailanyssyz termometrmen, qoldy antiseptikpen óńdeý júrgizýdi, ár qabatta qoljetimdi jerlerde antiseptigi bar sanitaizerler, las maskalardy jinaýǵa arnalǵan tańbalanǵan syiymdylyqtar (ýrnalar) ornatylyp, dozatorlardaǵy sabynnyń, qol jýý qaǵidalary bar plakattardyń bolýy qajet», delingen departamenttiń habarlamasynda.
