Túrkistan oblysynan soltústik óńirlerge 1700 otbasy nemese 6100 adam qonys aýdarǵan. Sala mamandary aǵymdaǵy jyly bul san eselep artýy tiis ekenin aitady, dep habarlaidy "Ult aqparat".
Búginge deiin soltústik aimaqtarǵa kóshken otbasynyń árbir múshesine 102 myń teńge berilse, endi eki eselenip 204 myń teńge tólenetin boldy. Turǵyn úimen, jumyspen qamtamasyz etý óz aldyna bólek júredi. Degenmen kóshtiń údere júrýine kedergi keltiretin problema da kóp. Búgin sol túiitkilderdi «Nur Otan» partiiasy Túrkistan oblystyq filialynyń uiymdastyrýymen keń kólemde talqylandy. Onlain formatta ótken jiynǵa Soltústik Qazaqstan, Shyǵys Qazaqstan, Pavlodar, Qostanai oblystaryndaǵy Jumyspen qamtýdy úilestirý jáne áleýmettik baǵdarlamalar basqarmasynyń basshylary men óńirdegi jumyspen qamtý ortalyqtarynyń mamandary qatysty.
«Alǵashqy kezekte «Eńbek» baǵdarlamasynyń eldi-mekenderde nasihaty kem. Onyń ústine karantin de sebep bolyp, ótken jyly nebári 347 otbasy ǵana kóshipti. Al, 2019 jyly 560 otbay qonys aýdarǵan edi. Endi osy mejeden asyrý basty jospar bolyp otyr. Jalpy atalǵan 4 oblysqa biyl 6039 adamdy qabyldaý mindeti qoiyldy. Sonyń ishinde Soltústik Qazaqstan oblysy 2347 adamdy qarsy alýǵa qyzý daiyndalýda. Basqarma basshysynyń orynbasary Rinat Sergeiuly olar úshin arnaiy úiler turǵyzylyp jatqandyǵyn aitty. Alaida Pavlodardan ózge eki óńirde qonys aýdarýshylar úshin jańa baspanalar soǵylyp jatqan joq. Negizinen bosap qalǵan úige ornalastyrady. Sonymen birge óńirler arasynda ortaq aqparattyq baza qalyptaspaǵan. Qai aimaqta qandai jumys oryndary bar, baspana baǵasy, sharýashylyq jaiy tb málimetterdi árkim ózinshe izdep, áýrege túsýde. Tolyq málimet almaǵandyqtan kópshiliktiń kókeiinde kúmán qalyp, tolyq sene bermeidi»,- deidi «Nur Otan» partiiasy Túrkistan oblystyq filialy tóraǵasynyń orynbasary Beisen Tájibaev.
Jiynda sonymen qatar kóship barǵanedarǵa janashyrlyq jetispeitini aityldy. Bul elimizde kóshi-qon salasymen ainalysatyn atqarýshy júiege tán kemshilik deidi mamandar.
«Máselen, aqparat surap kelgen turǵyndarǵa jumyspen qamtý ortalyǵynyń mamandary tiianaqty túsindirmeidi. Nemese kelesi mamanǵa siltei salady. Qysqasy sandaltady. Onsyz da qysylyp, jáýteńdep júrgen turǵyn budan soń tipten kóńili qalady, senbeidi, kóshpeidi. Isker, elshil fermer- kásipkerler aýadai qajet. Ázirge oblysta Jańabai Aǵabekov syndy azamattar az bolyp tur. Bul kásipkerdiń qoldaýymen sáýir aiynyń sońynda 3 avtobýs soltústik oblystardy aralap qaitýshylardy tegin aparyp, alyp qaitady. Keiin naqty sheshim qabyldaǵanda otbasymen birge, biýdjetten bólingen qarjynyń kómegimen kóshe beredi. Menimshe osyndai kásipkerler sol óńirlerden jer telimderin alyp, ońtústikten jumys kúshin tartqanda ǵana baǵdarlama ómirsheń bola túsedi»,- deidi mamandar.
Jiynda osy syndy máselelerdi keńinen talqylaǵandar ortaq sheshimge keldi. Sóitip barlyq aýdanda baǵdarlamaǵa jaýapty jeke maman bekitilip, ortaq internettik aqparattyq baza qalyptasatyn boldy. Tórt oblystyń ókilderi taiaýda Túrkistan oblysyn keńinen aralaý úshin delegatsiia tobyn attandyrmaq. Zańdaǵy kemshin tustardy tolyqtyrý úshin arnaiy usynymdar ázirlenedi. Ony Parlament Májilisindegi depýtattarǵa joldap, jaýapty ministrlikpen birge talqylaýlar uiymdastyrýǵa atsalysatyn bolyp sheshildi.
