Túrkistan oblysyna 5 mln-ǵa jýyq dárilik preparat keldi. Bul preparattar óz kezeginde halqy tyǵyz qonystanǵan óńirdegi dári-dármek tapshylyǵynyń oń sheshilýine yqpal etpek, dep habarlaidy "Ult aqparat".
Pandemiiamen kúres úshin oblys biýdjetinen qarajat bólinip, Ózbekstan elinen jetken kezekti partiianyń ishinde halyqqa eń qajet túrleri bar. Atap aitqanda, ambroksol, levoflaksatsin, aminofillin, azitromitsin, tseftriakson, paratsetamol, metranidazol, deksametazon, eýfillin sekildi pnevmoniia jáne koronavirýsqa qarsy preparattar kezdesedi.
Osynaý qajetti dári-dármektiń jartysy óńirdegi aýdan-qala aýrýhanalaryna taratylsa, jartysy ákimdiktermen memorandýmǵa otyrǵan 153 dárihanaǵa shekti baǵamen jóneltiledi.
Aita keteiik, buǵan deiin oblys ákimdigi halyqty qajetti dárilik zattarmen qamtamasyz etý maqsatynda jergilikti biýdjet esebinen 500 mln teńge qarajat bólgeni belgili. Osy qarajattyń arqasynda óńirge kórshiles Ózbekstannan 100 mln teńgege 142 myń qorap dári tasymaldanǵan bolatyn.
Onyń arasynda 1 mln 420 myń quty - «Askorbin qyshqylynyń inektsiiaǵa arnalǵan eritindisi», 100 myń dana - «Deksametazon inektsiiaǵa arnalǵan ampýla» jáne 30 myń quty «Aspirin» bar edi.
Sala basshylary pandemiia kezinde kórshiles memleketten jetkizilgen preparattardy oblystaǵy meditsinalyq uiymdar men dárihanalarǵa taratylatynyn aitqan. Dári-dármek shamamen 2 aiǵa deiin oblystaǵy naýqastarǵa jetedi dep túsindirgen.
