Shymkent qalasynda ótken «Qazaqstan Respýblikasy men Ózbekstan Respýblikasy arasyndaǵy óńiraralyq birinshi yntymaqtastyq forýmynda» Túrkistan óńiri ózbek eliniń Jizaq, Tashkent oblysy jáne Tashkent qalasymen memorandým túzdi.
Basqosýda Túrkistan oblysynyń ákimi Janseiit Túimebaev pen Jizaq oblysynyń ákimi Ergash Salievpen eki el arasyndaǵy saýda-ekonomikalyq jáne investitsiialyq yntymaqtastyqty nyǵaitý jaiyn talqylady.
«Qazirgi tańda, oblysymyzda investitsiialyq jobalardy jáne kásipkerlikti júzege asyrý boiynsha qolaily jaǵdai jasalǵan. Klimaty aýyl sharýashylyǵyna yńǵaily aimaqta egin men mal sharýashylyǵyna basymdyq berilgen. Sońǵy 3 jylda baqsha ónimderi 1 mln. tonnaǵa artty. Respýblikadaǵy jylyjailardyń 90 paiyzy bizdiń aimaqqa tiesili. Maqtanyń 100 paiyzy Túrkistan óńirinde óndiriledi. Osy rette, ózderińizdi birlesken túrde investitsiialyq jobalardy júzege asyrýǵa shaqyramyn. Bizdiń oblysta jumys isteýge nietti ózbek kompaniialaryna barynsha qoldaý kórsetetinimizdi aitqym keledi», – dedi Janseiit Qanseiituly.
Óz kezeginde Jizaq oblysynyń ákimi aitylǵan usynystarǵa rizashylyǵyn bildirip, birge jumys isteýge múddeli ekenin jetkizdi.
Sondai-aq, atalǵan forým sheńberinde qos eldiń birqatar óńirleri de memorandýmǵa qol qoidy. Túzilgen 13 qujatqa Túrkistan oblysynan basqa, Qaraǵandy, Shyǵys Qazaqstan, Qostanai óńirleriniń jáne Astana, Almaty, Shymkent qalalarynyń basshylyǵy qol qoidy.
