Nursultan Nazarbaev «Qazaqstan Respýblikasynyń ákimshilik-aýmaqtyq qurylysynyń keibir máseleleri týraly» jarlyqqa jariia túrde qol qoidy, dep habarlaidy "Ult aqparat".
Memleket basshysy jarlyqqa jariia túrde qol qoiý rásiminde sóilegen sózinde Shymkent millionnan astam turǵyny bar Astana men Almaty qalalarynyń qataryna qosylǵanyn aitty.
– «Qazaqstan Respýblikasynyń ákimshilik-aýmaqtyq qurylysy týraly» zańnyń 3-babynyń 1-tarmaǵyna sáikes búgin men qol qoiatyn jarlyq Shymkentke respýblikalyq mańyzy bar qala mártebesin beredi. Bul ákimshilik birlik elimizdegi on jetinshi aimaq bolady. Oblys ortalyǵy ǵasyrlar boiy Qazaq handyǵynyń jáne búkil túrki áleminiń saiasi ári rýhani ortalyǵy bolǵan Túrkistan qalasyna kóshiriledi, – dedi Qazaqstan Prezidenti.
Nursultan Nazarbaev jańadan qurylǵan Túrkistan oblysynda jańa ákimshilik fýnktsiialardy sapaly iske asyrý úshin barlyq múmkindikter bar ekenin aityp, qabyldanǵan sheshimniń tarihi mánine toqtaldy.
– Shymkent bizdiń eldiń ǵana emes, búkil Ortalyq Aziia óńiriniń investitsiialar, tehnologiialar jáne intellektýaldy resýrstar tartatyn jańa ortalyǵyna ainalady. Bul úshin barlyq jaǵdai men qajetti áleýet bar, – dedi Memleket basshysy.
Qazaqstan Prezidenti Shymkenttiń respýblikalyq mártebe alýy onyń odan ári ilgerileýine septigin tigizetinine jáne qalanyń aldynda jańa perspektivalar ashylatynyna senim bildirdi.
– Bul qadam shahardyń teńgermeli áleýmettik-ekonomikalyq damýyna jáne búkil óńir turǵyndarynyń turmys sapasynyń dáiekti túrde artýyna tyń serpin beredi, – dedi Nursultan Nazarbaev.
Qol qoiý rásiminiń sońynda Memleket basshysy Prezident Ákimshiligine, Úkimetke jáne oblys ákimdigine jarlyqty sapaly ári shuǵyl iske asyrý, sondai-aq jergilikti memlekettik organdar men mekemelerdiń úzdiksiz ári tiimdi qyzmetin qamtamasyz etý jóninde birqatar tapsyrma berdi.
