Foto: Gov.kz.
Túrkistan oblysynda jalpy 362 287 zeinetker bar. Onyń ishinde: 186 489 azamat jasyna bailanysty zeinetaqy alýshy bolsa, 175 198-i bazalyq zeinetaqy alýshy. Sonymen qatar, óńirdiń 346 238 azamaty járdemaqy alýshylar qatarynda, dep habarlaidy «Ult aqparat».
Bul jaiynda Halyqty áleýmettik qorǵaý salasyndaǵy retteý jáne baqylaý komitetiniń Túrkistan oblysy boiynsha departament basshysy Begman Nurmahanov brifingte málimdedi.
«Túrkistan oblysy elimizde kópbalaly otbasylar kóptiginen kósh bastap tur. Búgingi tańda óńirde 120 549 kópbalaly otbasy járdemaqy alady. Sondai-aq, 64 354 kópbalaly anaǵa departament járdemaqy belgilegen. Budan bólek, 75 262 oblys turǵyny múgedektigi boiynsha járdemaqy alsa, 21 839 azamat asyraýshysynan airylý sebebinen memlekettik járdemaqy alady» - dedi spiker.
Sonymen qatar, departament basshysy meditsinalyq-áleýmettik saraptama júrgizý jumystaryna toqtaldy. Statistikalyq málimetterge sáikes, 2024 jyldyń 1 qazan aiyndaǵy kórsetkish boiynsha oblysta múgedektigi bar adamdardyń sany 100 029-ǵa jetip, respýblikadaǵy jalpy múgedekter sanynyń 13,7%-n qurady. Múgedektigi bar adamdardyń 15 189-y kámelet jasyna tolmaǵandar bolsa, qalǵan 84 840-i 18 jastan asqan oblys turǵyndary.
Jyl basynan beri departament tarapynan múgedektigi bar adamdardy áleýmettik qorǵaý salasyndaǵy memlekettik baqylaýdy júzege asyrý boiynsha barlyǵy 196 tekserý jumystary júrgizilgen. Tekserý qorytyndysymen 51 nusqama berilip, jalpy 160 nysanǵa 34 mln. 187 myń teńge kóleminde ákimshilik aiyppul salynǵan. Onyń 33 mln. 228 myń teńgesi óndirilgen.
