Selden keiin qyrylǵan mal. Túrkistan oblysy Qazyǵur aýdany Jińishke aýyly. 25 sáýir, 2022 jyl.
25 sáýirge qaraǵan túni Túrkistan oblysy Qazyǵurt jáne Saryaǵash aýdanynda bolǵan selden kemi tórt júz mal qyrylyp, 18 úige sý kirdi. Bul týraly oqiǵa orynynda júrgen Azattyq tilshisi habarlady.
Otbasymen mal baǵyp kún kóretin Saraphana aýylynyń turǵyny Ǵaziza Batyrhanova nóser jańbyrdan keiin shamamen 20 minýtta sel júrip, sý adam boiyna jetkenin aitady. Ol qorasyndaǵy iri qara men tórt júz qoidyń jartysyna jýyǵyn shyǵaryp úlgergenimen, qalǵany lai sýǵa tunshyǵyp, qorasynda ólgen.
- Bul - 25 otbasynyń qoiy edi. Biz jaiatyn edik. Túngi saǵat toǵyzdar shamasy sý keldi. Úiden shyqqanymyz sol-aq edi, sý keýdemizge deiin kóterildi. Úlgere almadyq. Iri qala mal men jylqyny shyǵardyq. Qoidyń qorasy sýǵa toldy. Qorany buzyp 187 bas qoidy aman alyp qaldyq. Qalǵany tunshyǵyp óldi, - deidi ol.
Turǵyndardyń aitýynsha, tótenshe jaǵdai týraly aldyn-ala eskertý bolmaǵan. Sýmen birge aǵyp kelgen lai aýla men qoralardy basyp qalǵan. Tańǵa deiin óz kúshterimen tazalaýǵa tyrysqan.
- Tańerteń ákimdikke kómek surap bardyq. Tehnika bereiik, ózderiń janarmaiyn quiyp tazalatyńdar dedi. Endi sol kómek kútip otyrmyz, - deidi Jińishke aýylynyń turǵyny Meńdibai Jubatov.
Aýdanda tótenshe jaǵdaiǵa bailanysty arnaiy komissiia qurylyp, shyǵyn kólemi anyqtalyp jatyr. Aýdan ákimdigi dúisenbi túske deiin selden sýǵa aǵyp ne tunshyǵyp ólgen 312 mal tirkelgenin, naqty sany áli eseptelip jatqanyn habarlady. Túrkistan oblysy ákimdiginiń málimetinshe, selden 53 úidiń aýlasyna sý kirgen.
"18 úige, bir meiramhana men 16 ǵimaratqa sý kirgen. Adam shyǵyny joq. Qaýip-qater seiilgen. Evakýatsiialanǵan turǵyndar úiine qaitty" deidi ákimdik.
