Túrkistan oblysy, Maqtaaral aýdany Firdoýsi eldi mekeninde ornalasqan A.Firdoýsi atyndaǵy jalpy orta mektebindegi jaǵdai turaqtandy, dep habarlaidy "Ult aqparat" oblystyq bilim basqarmasyna silteme jasap.
«A.Firdoýsi atyndaǵy jalpy orta mektepte 700 oqýshy bilim alsa, sonyń 371-i - qyz balalar. Olardyń barlyǵy derlik mektepke dini atribýttyq belgileri bar formamen kelip júrgen. Júieli jumystyń nátijesinde 4 qyrkúiek kúni bastaýysh synypta oqityn (1-4 synyptar) qyz balalardyń barlyǵy talapqa sáikes formaǵa kóshti. Al, joǵary synypta oqityn qyz balalardyń 165-i biryńǵai mektep formasyn saqtap, sabaqqa qatysyp otyr. Sondai-aq, mektep formasyn saqtamaǵan 60 qyz balamen mamandar jumys júrgizip jatyr» delingen oblystyq bilim basqarmasy taratqan habarlamada.
Bilim jəne ǵylym ministriniń «Orta bilim berý uiymdary úshin mindetti mektep formasyna qoiylatyn talaptardy bekitý» týraly 2016 jylǵy 14 qańtardaǵy buiryǵyn saqtaý týraly túsindirý jumystary turaqty túrde júrgizilgen. Máseleni sheshý úshin aýdan ákimdigi jáne oblystyq bilim, ishki saiasat, otbasy, balalar jáne jastar isi jónindegi basqarmalarynyń qatysýymen arnaiy jumysshy top qurylyp, naqty is-shara jospary bekitildi. Toptyń quramyna oblystyq deńgeidegi quqyq qorǵaý organdarynyń qyzmetkerleri de qosyldy.
A.Firdoýsi atyndaǵy jalpy orta mektepte 3 qyrkúiekten bastap biryńǵai mektep formasyn saqtamaǵan oqýshylarǵa bilim uiasyna kirýge tyiym salyndy. Sondai-aq, 3 kún boiy mektepten qalǵan oqýshylardyń ata-analaryna aiyppul salý sharalary júrgizilip jatyr.
«Narazylyq tanytqan aýyl turǵyndaryna jumysshy toptyń músheleri túsindirý jumystaryn jan-jaqty júrgizdi. Memlekettik organdar men dini birlestik mamandary da ata-analar qaýymy, aýyl bileri jəne ziialy qaýym ókilderimen birge jiyndar ótkizip, zaiyrly memlekettiń bilim uialaryndaǵy ortaq standarttardy saqtaý talaby túsindirildi. Arnaiy barǵan 40 psiholog maman muǵalimdermen jáne oqýshylardyń árbirimen jumys istep, zaiyrly eldegi eń basty qundylyq - memleket zańyna baǵyný ekenin aitty. Kúizeliske qarsy turý jáne onyń aldyn alý boiynsha túsindirý jumystary men treningter ótkizilýde. Búginde oblystyq bilim basqarmasy men jergilikti ákimdik tarapynan áleýmettik jospar jasalǵan. Qyrkúiektiń 7-sinen bastap oqýshylar sporttyq jáne mádeni is-sharalarǵa qatysady» dep habarlady Túrkistan oblystyq bilim basqarmasy.
Aita keteiik, jańa oqý jyly qarsańynda A.Firdoýsi atyndaǵy jalpy orta mektep ǵimaratynyń ashylý saltanaty ótti. Biyl respýblikalyq biýdjetten 600 oryndyq bilim uiasyna 1 mlrd 350 million teńge bólinip, sońǵy úlgidegi oqý orny salynǵan bolatyn.
