Memleket basshysy Qasym-Jomart Toqaevtyń koronavirýspen kúresip jatqan meditsina qyzmetkerlerine kómek kórsetý týraly tapsyrmasyna sáikes, Túrkistan oblysynda 1994 dáriger ústemeaqy aldy, dep habarlaidy oblystyq ákimdiktiń baspasóz qyzmeti.
COVID-19 infektsiiasymen kúreste aianbai eńbek etip júrgen mamandar jumys qaýiptiligine qarai 3 topqa bólingen.
Táýekeldiń birinshi tobyna óte qaýipti jaǵdaida jumys isteitin 27 qyzmetker endi. Ekinshi sanat qaýiptiligindegi dárigerler men feldsherlerge, iaǵni, 337 meditsina mamandaryna ústemaqy tólendi. Úshinshi topqa 1630 qyzmetkeri enip otyr. Ústemaqy alǵandar reanimatsiia bólimderin qosa alǵanda, juqpaly aýrýlar statsionarlarynyń dárigerleri, karantindik aimaqtaǵy orta jáne kishi býyn meditsina qyzmetkerleri. Sondai-aq provizorlyq statsionar men jedel járdem qyzmetiniń dárigerleri jáne jedel-járdem júrgizýshileri.
Qazyǵurt aýdandyq ortalyq aýrýhanasynyń bas dárigeri ári oblystyń bas infektsionist - dárigeri Baqtyǵali Erejepov qiyn sátte tapjylmai indetpen kúresip júrgen ujymdaǵy ár qyzmetkerdiń erligin jáne tabandylyǵyn erekshe baǵalaityndyǵyn aitýda.
«Qazyǵurt aýdanynyń meditsina qyzmetkerlerine bólingen barlyq dárigerler men orta jáne kishi býyn qyzmetkerlerimiz ústemaqylaryn alyp jatyr. Memleket basshysynyń tapsyrmasyna sáikes berilip jatqan bul qarjylai kómek jáne yntalandyrý sala mamandaryna úlken qoldaý boldy», - deidi oblystaǵy ár naýqasty ózi jeke baqylap, dárigerlik em kórsetip qana qoimai, jyly sózimen úmit syilap júrgen joǵary bilikti infektsionist-dáriger Baqtyǵali Aiýbaiuly.
Atalǵan aýrýhanaǵa qarasty provizorlyq gospitaldyń dárigeri Baqyt Aqynǵazieva 2 sanat boiynsha 425 myń teńge ústemaqy aldy. Asyl jar, 4 balanyń anasy qarýsyz maidanda adam ómirin arashalap júrgen aq jeleńdi abzal jan bir aiǵa jýyq ýaqyt jaqyn týystaryn kórmegen. Óz kásibi qyzmetin basty mindet sanaityn aq jelekti abzal jan barlyq áriptesteriniń atynan alǵysyn bildiredi.
