Foto: Gov.kz.
Túrkistan oblysynda 25 myń agroqurylym maqta sharýashylyǵymen ainalysady. 2024 jyly 106,4 myń gektarǵa maqta daqyly egilip, jalpy egistiktiń 12 paiyzyn qurady, dep habarlaidy «Ult aqparat».
Kúzgi jiyn-terim barysynda týyndaǵan máselelerdi der kezinde sheshý jáne taýar óndirýshiler arasynda aqparattyq túsindirý sharalaryn júrgizý úshin oblys ákimi Darhan Satybaldy arnaiy jumys tobyn jasaqtap, jaǵdaidy turaqty baqylaýyna aldy.
Oblys ákiminiń orynbasary Nurbol Turashbekov Jetisai jáne Maqtaaral aýdanynyń sharýalarymen kezdesip, alqaly májilis ótkizdi.
Aýyl sharýashylyǵy basqarmasynyń basshysy Nurbek Badyraqov memlekettik qoldaý aiasynda qarjylardyń basym bóligi maqta sharýashylyǵyn damytýǵa baǵyttalǵanyn aita kele, baǵdarlamalar boiynsha atqarylǵan jumys esebin usyndy.
Maqta zaýyttarynyń ókilderi men sharýalar kúrmeýli máselelerin ortaǵa salyp, usynystaryn jetkizdi. Maqta qabyldaý beketteriniń jumysyn júieleý, maqtany suryptai otyryp baǵalaý, sý únemdeý tehnologiiasyn endirýge qatysty suraqtarǵa jaýap bere otyryp Nurbol Turashbekov:
– Maqtanyń baǵasy túspeý úshin ózderińizben birge onyń sapasyn arttyrýǵa kúsh salýymyz kerek. Usynystaryńyz oryndy, egiletin maqta tuqymyna kóńil bólý kerek. Bul baǵyttaǵy ákimdik tarapynan qolǵa alynǵan bastamalar eń aldymen sharýashylyqtardyń múddesin kózdeitinin atap ótkim keledi, – dedi ol.
Qazirgi tańda ákimdik tarapynan maqta óńdeýshi zaýyt basshylarynyń jáne qoǵamdyq uiymdardyń kelisimderimen, sondai-aq qoǵamdyq uiym belsendilerin qatystyra otyryp arnaiy mobildi jumys toby quryldy. Mobildi top arqyly qyrkúiek aiynda baqylaý júrgizilip, maqta óńdeý zaýyttarynyń maqta qabyldaý beketterindegi zerthanalar men tarazylar tolyq sertifikattaýdan ótkizildi.
