Foto: Gov.kz
Búgin segizinshi shaqyrylymdaǵy Túrkistan oblystyq máslihatynyń kezekten tys on úshinshi sessiiasy ótti. Mańyzdy jiynǵa Túrkistan oblysynyń ákimi Darhan Satybaldy, oblystyq máslihat tóraǵasy Nuraly Ábishov qatysty, dep habarlaidy «Ult aqparat».
Sessiiada Túrkistan oblystyq máslihatynyń 2023 jylǵy 13 jeltoqsandaǵy №7/85-VIII «2024-2026 jyldarǵa arnalǵan oblystyq biýdjet týraly» sheshimine ózgerister engizý týraly; «Memlekettik-jekeshelik áriptestik jobalary boiynsha memleketttik mindettemelerdi qabyldaý týraly» Ońtústik Qazaqstan oblystyq máslihatynyń 2017 jylǵy 24 tamyzdaǵy №14/172-VI sheshimine ózgeris engizý týraly; «Túrkistan oblysynyń halqyn ortalyqtandyrylmaǵan aýyz sýmen jabdyqtaý kezinde jer ústi jáne jer asty sý obektilerinen sý alý Erejesin bekitý týraly» 2019 jylǵy 9 jeltoqsandaǵy № 44/476-VI sheshimine ózgeris engizý týraly máseleleri qaralyp, tiisti sheshim qabyldandy.
Sessiiany oblys ákimi Darhan Satybaldy qorytyndylap, óńirdi damytý baǵytyndaǵy júieli jumys jalǵasatynyn jetkizdi.
– Aldymen barshańyzdy Respýblika kúnimen quttyqtaimyn! Memleketimiz qýatty, ár kúnimiz shýaqty bolsyn! Búgingi sessiiada kóterilgen mańyzdy máseleler talqylanyp, olar boiynsha sheshimder qabyldandy. Sessiia barysynda qaralǵan máselelerge biraýyzdan qoldaý kórsetkenderińiz úshin alǵysymdy bildiremin. Memleket tarapynan Túrkistan oblysyn damytýǵa úlken qoldaý kórsetilýde. Jýyrda el Prezidenti Qasym-Jomart Kemeluly Túrkistan oblysyna jumys saparymen keldi. Aimaqty damytý, investitsiia tartý, óndiris oryndaryn kóbeitý baǵytyndaǵy bastamalarǵa oń baǵasyn berdi. Bizdiń basym baǵytymyz – óndiris oryndaryn, zaýyttar, jumys oryndaryn ashý. Osy baǵytta sizdermen birlesip jumys isteimiz degen senimdemin, – dedi Darhan Satybaldy.
